Landslið
UEFA EM A-landsliða kvenna

A kvenna - Öruggur sigur á Ungverjum

Næsti leikur gegn Búlgaríu ytra

16.6.2012

Íslenska kvennalandsliðið vann góðan sigur á Ungverjum í undankeppni EM en leikið var á Laugardalsvelli í dag.  Lokatölur urðu 3 - 0 fyrir Ísland og leiddu stelpurnar með tveimur mörkum í leikhléi.

Íslenska liðið hóf leikinn af krafti og Margrét Lára Viðarsdóttir kom íslenska liðinu yfir eftir sjö mínútna leik eftir sendingu frá Fanndísi Friðriksdóttur.  Í kjölfarið fékk svo Fanndís tvö góð marktækifæri sem ekki nýttust.  Ungverska liðið sótti svo í sig veðrið og á tveggja mínútna kafla þurftu Þóra tvisvar að taka á honum stóra sínum í markinu þegar gestirnir gerðust aðgangsharðir.  Það var svo á 42. mínútu sem Hólmfríður Magnúsdóttir setti boltann í netið eftir sendingu frá Fanndísi og tveggja marka forysta í leikhléi.

Íslenska liðið var sterkari aðilinn í síðari hálfleiknum og komu boltanum í netið eftir aðeins tveggja mínútna leik en skallamark Dóru Maríu Lárusdóttur var dæmt af vegna rangstöðu.  Ekki voru mörg færi á boðstólum í síðari hálfleiknum en íslenska liðið hafði leikinn í höndum sér.  Eitt mark leit þó dagsins ljós í viðbót og það kom á 86. mínútu.  Þar var að verki Sandra María Jessen eftir frábæra sendingu frá Katrínu Ómarsdóttur.  Ekki aðeins var Sandra María að skora í sínum fyrsta landsleik heldur gerði hún það einnig í sinni fyrstu snertingu því hún kom inná aðeins tveimur mínútum áður.

Stuttu síðar flautaði rúmenski dómarinn til leiksloka og 1.395 áhorfendur fögnuðu öruggum sigri í blíðunni á Laugardalsvelli.  Stigin gríðarlega mikilvæg og er liðið nú á toppi riðilsins, einu stigi á undan Noregi.  Norðmenn unnu stóran sigur á Búlgörum í dag, 11 - 0.  Búlgarir eru einmitt næstu mótherjar íslenska liðsins en liðið heldur utan á mánudaginn.  Leikurinn fer fram á fimmtudaginn, 21. júní.

Staðan í riðlinum


Mót landsliða




Landslið




Aðildarfélög




Aðildarfélög