Jafnt hjá U21 karla í Slóvakíu
Leikið við Belga á Akranesi þriðjudaginn 11. september kl. 17:30
Strákarnir í U21 karla gerðu í dag jafntefli Slóvakíu i riðlakeppni EM U21 en leikið var ytra í grenjandi rigningu. Lokatölur urðu 2-2 og skoruðu Bjarni Þór Viðarsson og Theódór Elmar Bjarnason mörk Íslendinga.
Eftir frekar jafnan fyrri hálfleik tókst heimamönnum að komast yfir í lok fyrri hálfleiks og leiddu því þegar gengið var til búningsherbergja í hálfleik. Bjarni Þór Viðarsson jafnaði leikinn úr vítaspyrnu fljotlega í seinni hálfleik. Slóvakar komust yfir um miðjan seinni hálfleik en strákarnir gáfust ekki upp og Theódór Elmar Bjarnason jafnaði leikinn með góðu marki seint í leiknum.
Lokatölur því 2-2 í leik sem leikinn var við erfiðar aðstæður í Slóvakíu. Fyrsta stig strákanna staðreynd og gefa þessi úrslit góð fyrirheit fyrir næsta leik gegn Belgum í riðlinum. Hann fer fram á Akranesvelli, þriðjudaginn 11. september og hefst kl. 17:30.
