Landslið
Hart barist í leik Armena og Letta

Lettar luku keppni með fullt hús stiga

Þurftu svo sannarlega að hafa fyrir sigrinum gegn Armeníu

24.1.2011

Lettar luku keppni í riðlinum í forkeppni EM í Futsal sem fram fer að Ásvöllum með fullt hús stiga, unnu Armena í lokaleiknum og þar með alla leikina þrjá.  Fyrirliðinn Andrejs Aleksejevs, sterkasti leikmaður Letta, var hvíldur í lokaleiknum, enda efsta sætið öruggt.  Armenar létu lettneska liðið svo sannarlega hafa fyrir sigrinum í dag og börðust af miklum krafti allan leikinn.  Allt leit út fyrir að markalaust yrði í fyrri hálfleik þó bæði lið hafi átt nokkur úrvals tækifæri, en Lettar skoruðu eina markið úr skyndisókn þegar innan við ein mínúta var eftir.

Armenarnir héldu baráttunni áfram í seinni hálfleik, létu vel finna fyrir sér og uppskáru fljótlega jöfnunarmark.  Lettar fengu nokkur upplögð marktækifæri í kjölfarið og þá sérstaklega Aleksandrs Zukovs, en Harutyun Harutyunyan í armenska markinu var í miklu stuði og varði fjölmörg skot sem hittu rammann, auk þess sem lettnesku leikmennirnir settu boltann í marksúlurnar í nokkur skipti.  Forystan var loks Letta þegar um 5 mínútur voru eftir af leiknum, þegar þeir skoruðu eftir fast leikatriði eftir að aukaspyrna hafði verið dæmd rétt utan teigs Armena.  Meira var ekki skorað og 2-1 sigur lettneska liðsins staðreynd.  Armenar luku því keppni í riðlinum með eitt stig.

Ljóst var fyrir leikinn að Lettar væru komnir áfram og munu þeir leika í undankeppninni í febrúar, þar sem þeir eru í riðli með Ítölum, Slóvenum og Bosníumönnum.

Tengill á leikskýrsluna á uefa.com

Tengill á mótið á ksi.is


Mót landsliða




Landslið




Aðildarfélög




Aðildarfélög