Félagaskipti leikmanna
REGLUGERÐ KSÍ UM FÉLAGASKIPTI LEIKMANNA
FÉLAGASKIPTI INNANLANDS
A. ALMENN ÁKVÆÐI
1. Hlutgengir til þátttöku í knattspyrnumótum eru leikmenn, sem gerst hafa félagar í því félagi sem þeir keppa með, eigi síðar en degi áður en kappleikur fer fram. Kjósi leikmaður að skipta um félag er hann hlutgengur með nýja félaginu degi eftir að fullfrágengin tilkynning um félagaskiptin hefur verið móttekin af skrifstofu KSÍ, sbr. A5 og greinar B1 og B2 hér að neðan, og gefið hefur verið út keppnisleyfi fyrir hann.
2. Leikmaður er hlutgengur til keppni með því félagi sem hann æfir fyrst knattspyrnu með, svo fremi að félagið hafi látið skrá leikmanninn hjá KSÍ.
3. Leikmaður, sem er handhafi keppnisleyfis, sem hefur verið útgefið af KSÍ, skal ávallt vera hlutgengur til keppni í knattspyrnumótum á Íslandi svo fremi sem aðrar takmarkanir eru ekki fyrir hendi (t. d. aldur, kyn o. s. frv.). KSÍ getur afturkallað keppnisleyfi ef mistök eða rangfærslur hafa leitt til þess að það var gefið út. Í slíku tilfelli flyst leikmaðurinn í sitt fyrra félag.
4. Hafi leikmaður leikið í Íslandsmóti eða Bikarkeppni KSÍ á almanaksárinu, getur hann aðeins einu sinni farið fram á félagaskipti innanlands til og með 31. júlí. Frá og með 1. ágúst til og með 15. október eru félagaskipti innanlands ekki heimil. Samninga- og félagaskiptanefnd skal þó heimilt að veita undanþágu frá því fyrir félagaskipti markvarðar ef ríkar ástæður eru til að mati nefndarinnar. Leikmaður sem skráður er hjá erlendu knattspyrnusambandi (samningsleikmaður/professional) getur aðeins gengið til liðs við íslenskt félagslið frá og með 15. nóvember til og 31. maí ár hvert, eða frá og með 15. júlí til og með 31. júlí; leikmaðurinn getur þó aðeins haft keppnisleyfi með tveimur félögum á 12 mánaða tímabili, sbr. ákvæði í reglugerð FIFA. Ákvæði um tímabundin félagaskipti veita þó rýmri heimildir sbr. kafla B. Leikmanni er aðeins heimilt að leika með einu félagi í Íslandsmóti innanhúss. Leikmönnum í 4. aldursflokki eða yngri skal þó heimilt að hafa félagaskipti strax að loknu Íslandsmóti í þessum flokkum.
5. Tilkynning um félagaskipti er jafnframt yfirlýsing um, að allir undirritaðir skuldbindi sig til að hlíta gildandi reglugerðum KSÍ um félagaskipti og samninga og stöðu félaga og leikmanna. Á tilkynningunni skal koma fram nafn og kennitala leikmanns og upplýsingar um hvort hann hefur verið samningsbundinn á undanförnum 3 árum og þá hvar, hvernig og hvenær hann var það síðast, félags þess sem hann er í, félags þess sem hann óskar eftir að ganga í, dagsetning tilkynningarinnar og staðfesting þessara þriggja aðila með undirritun. KSÍ skal útbúa og leggja til eyðublað til tilkynningar um félagaskipti. Félög eða félagadeildir verða við félagaskipti eingöngu skuldbundin af framkvæmdastjóra, stjórnarmönnum eða þeim aðila sem félagið veitir slíkt umboð. Með staðfestingu sinni á tilkynningu um félagaskipti lýsir
- - leikmaður yfir að hann óski eftir að ganga úr því félagi, sem hann er í og yfir í nýja félagið. Ef samningur er enn í gildi milli leikmanns og félags lýsir leikmaðurinn yfir því að félagið hafi verið leyst frá honum, sbr. þó D 3.
- - félag leikmannsins yfir að leikmaður hafi fullnægt öllum skuldbindingum sínum gagnvart félaginu og sé heimilt að skipta yfir í nýja félagið. Ef samningur er enn í gildi milli leikmanns og félags lýsir félagið yfir því að leikmaðurinn hafi verið leystur frá honum, sbr. þó D 3. Jafnframt lýsir félagið yfir því að gengið hafi verið frá greiðslu félagaskiptagjalds, sem krafa hefur myndast um við sjálf félagaskiptin.
- - nýja félag leikmannsins yfir að það samþykki inngöngu leikmanns í félagið og lofar jafnframt að standa fyrra félagi hans og/eða þeim öðrum félögum sem kröfu eiga á félagaskiptagjaldi skil á því innan eins mánaðar frá því að slík krafa myndast, enda hafi ekki verið um annað samið milli félaganna.
6. Þegar komið er með tilkynningu um félagaskipti á skrifstofu KSÍ verður keppnisleyfi gefið út samstundis ef öllum formatriðum sem lýst er hér að framan er fullnægt og skrásetningargjald er greitt. Ef tilkynning um félagaskipti er send á faxi skal fylgja með henni afrit af greiðslukvittun banka á skrásetningargjaldinu. Einnig skal fylgja með tilkynningunni faxnúmer sem keppnisleyfið verður sent á. Ef öllum formsatriðum er ekki fullnægt á símsendri tilkynningu verður hún ekki afgreidd og ekkert keppnisleyfi gefið út. Móttökudagur verður skráður þegar öllum formsatriðum hefur verið fullnægt, þó má greiðsla vegna símsendrar tilkynningar berast næsta dag.
7. Skrifstofa KSÍ hefur heimild til að seinka útgáfu keppnisleyfis, ef ástæða er til að ætla að tilgangur félagaskiptanna hafi verið sá að viðkomandi leikmaður komist hjá því að taka út leikbann, sem hann hefur áður verið dæmdur í.
8. Leikmaður fær keppnisleyfi þegar skrifstofa KSÍ hefur móttekið fullfrágengna tilkynningu um félagaskiptin og skal leikmaðurinn fá keppisleyfi með nýja félaginu frá og með næsta degi eftir móttöku. Almennt skal gilda, að leikmaður fær keppnisleyfi frá og með tilteknum degi hafi fullfrágengin tilkynning um félagaskiptin borist til skrifstofu KSÍ daginn áður eða á faxi fyrir miðnætti daginn áður, en þó verða tilkynningar sem berast um helgar og á frídögum að öllu jöfnu afgreiddar næsta virka dag og keppnisleyfi gefið út frá og með þeim degi.
9. Leikmaður getur ekki dregið félagaskiptin til baka eftir að hann er orðinn hlutgengur með nýja félaginu, eða eftir að hann hefur skrifað undir samning við nýja félagið.
10. Ef félag, sem leikmaður gengur úr, vill ekki undirrita félagaskipti hans, þrátt fyrir að hann hafi fullnægt öllum skuldbindingum sínum gagnvart félaginu, er framkvæmdastjóra KSÍ heimilt að gefa út keppnisleyfi fyrir leikmanninn að undangengnum árangurslausum sáttatilraunum milli félaganna. Í því tilfelli að um ósamningsbundinn leikmann er að ræða getur félag leikmanns aðeins gert kröfu um skil á félags og æfingagjöldum og aðeins ef það hefur verið innheimt af öðrum í sama flokki
B. TÍMABUNDIN FÉLAGASKIPTI
1. Félagi er heimilt að semja um tímabundin félagaskipti til annars félags fyrir leikmann sem er á samningi samkvæmt reglum KSÍ. Samkomulag um slík félagaskipti skal gert á eyðublað útgefið af skrifstofu KSÍ (Tilkynning um tímabundin félagaskipti) og undirritað af samningsfélagi leikmannsins, félagi sem fær leikmanninn til sín og leikmanninum. Á tilkynningunni skal koma fram lokadagsetning félagaskipta, þ. e. hvaða dag leikmaðurinn skal snúa til samningsfélags síns. Leikmaðurinn skal fá keppnisleyfi með nýja félaginu degi eftir að tilkynningin hefur verið móttekin og skráningargjald greitt. Leikmaðurinn fær keppnisleyfi með samningsfélagi sínu að nýju degi eftir lokadagsetningu félagaskipta eða næsta virka dag þar á eftir. Lágmarkstími tímabundinna félagaskipta er 1 mánuður og skal telja frá þeim degi sem keppnisleyfi er gefið út. Leikmaður sem hefur fengið tímabundin félagaskipti með lokadagsetingu frá og með 1. ágúst fær keppnisleyfi með samningsfélagi sínu að nýju 16. október sama ár. Hámarkstími tímabundinna félagaskipta skal vera 12 mánuðir en lokadagsetning skal eigi vera síðar en 15. október. Heimilt skal að stytta tímabundin félagaskipti sem skráð hefur verið en þó skal lágmarkstími ævinlega vera 1 mánuður. Í slíku tilfelli skal það gert með tilkynningu um félagaskipti. Tilkynning um tímabundin félagaskipti jafngildir tilkynningu um félagaskipti bæði við upphaf láns og í lok lánstíma.
2. Tímabundin félagaskipti til Íslands skulu að lágmarki ná að næsta félagaskiptatímabili, sbr. grein A4.
3. Félög sem semja um tímabundin félagaskipti leikmanns skulu gera um það skriflegan samning sem fram koma kvaðir félaganna og hlutur leikmanns og skal hann undirritaður af báðum félögum og leikmanni. Komi til vanefnda af hálfu félags sem fær til sín leikmann með tímabundnum félagaskiptum skal samningsfélag leikmanns ábyrgt fyrir efndum á leikmannssamningi hans. Brot á ákvæðum þessum skal fara með skv. kafla H í reglugerð KSÍ um samninga og stöðu félaga og leikmanna.
C. ERLENDIR LEIKMENN
1. Gerist erlendur ríkisborgari leikmaður með íslensku liði telst hann hlutgengur hafi hann verið búsettur hér á landi í einn dag, sbr. þó grein A 4 hér að framan. Ekki geta fleiri en þrír erlendir leikmenn frá öðrum löndum en Evrópska Efnahagssvæðinu, Færeyjum og Grænlandi verið skráðir á leikskýrslu í 1. aldurflokki í hvert sinn í leik á vegum KSÍ.
2. Um félagaskipti erlendra leikmanna, sem leikið hafa með íslensku félagi, gilda ákvæði þessarar reglugerðar.
D. SÉRÁKVÆÐI FYRIR LEIKMENN SEM ERU EÐA HAFA VERIÐ SAMNINGSBUNDNIR
Leikmaður, sem er samningsbundinn við félag, getur ekki haft félagaskipti, nema félagið og hann séu sammála um að leysa hvorn annan frá samningnum. Eftir að samningur rennur út skulu félagaskiptin hlíta eftirfarandi ákvæðum. Sömu ákvæði gilda um leikmannssamninga og sambandssamninga, sbr. reglugerð KSÍ um samninga og stöðu félaga og leikmanna.
1. Félagaskiptum leikmanna, sem verið hafa á samningi, til, frá eða milli samningsfélaga / sambandsfélaga fylgja greiðslur milli félaga. Slíkar greiðslur skulu ákvarðast af eftirfarandi reglum.
2. Grunngjaldið A er 70.000 kr. Allar greiðslur milli félaga vegna félagaskipta reiknast sem margfeldi af grunngjaldi samkvæmt eftirfarandi reglum. Félagaskiptagjald getur aldrei orðið hærra en tífalt grunngjald eins og fram kemur í grein 4 og 7, sbr. þó grein 10. Grunngjaldið skal endurskoðað reglulega af stjórn KSÍ og skal hún taka mið af verðlagsbreytingum. Nýja grunngjaldið skal taka gildi frá næstu áramótum.
3. Ef leikmaður, sem hefur ekki verið samningsbundinn undanfarin 3 ár og hefur leikið fyrir annað félag (önnur félög) einhvern hluta af þeim tíma, gerir samning við félag, þá skal það greiða gjald til hinna félaganna, og skal heildarupphæðin nema grunngjaldinu. Gjaldið reiknast þannig að félag á rétt á þriðjungi af grunngjaldi fyrir hvert keppnistímabil af þessum þremur sem leikmaðurinn var hjá því. Ef um skemmri tíma er að ræða reiknast upphæðin út frá lengd tímans í hlutfalli við lengd keppnistímabilsins, sem hér telst standa frá 1. mars til 15. október.
4. Ef leikmaður, sem hefur verið samningsbundinn, gerir samning við nýtt félag skal það greiða fyrra félaginu, sem hann var samningsbundinn við, gjald fyrir. Gjaldið skal vera grunngjaldið A, samkvæmt grein 2, margfaldað með afreksstuðlinum B, samkvæmt grein 7, 8 og 9; sbr. þó grein 10.
5. Leikmaður, sem hefur verið á samningi, getur ekki í eitt ár eftir að samningur hans rennur út, skipt um félag og leikið án samnings í Landsbankadeild eða 1. deild karla, eða í Landsbankadeild kvenna, né í sömu deild eða efri deild en hann lék í áður og ekki með neinu félagi, sem er með samningsleikmenn/sambandsleikmenn, nema áður sé greitt gjald samkvæmt 4. grein til félagsins sem hann gerði síðast samning við. Ef félag, sem er ekki með samningsbundna leikmenn, greiðir gjald vegna félagaskipta leikmanns samkvæmt þessu ákvæði, skal það njóta sama réttar varðandi leikmanninn ef hann skiptir aftur um félag.
6. Geri leikmaður, sem verið hefur samningsbundinn a.m.k. eitt af síðustu þremur keppnistímabilum, samning við annað félag skal það greiða því félagi, sem hann var síðast samningsbundinn við gjald samkvæmt 4. grein.
7. Afreksstuðullinn B er í 5 þrepum. Fyrir íslenska ríkisborgara (í a.m.k. 4 ár) skilgreinist hann á eftirfarandi hátt fyrir karla:
Stuðullinn er 10 fyrir leikmann sem er
29 ára eða yngri og hefur leikið
a.m.k. helming af A-landsleikjum Íslands undangengin 4 ár;
eða
a.m.k. 20 A-landsleiki.
25 ára eða yngri og hefur leikið
a.m.k. helming af A-landsleikjum Íslands undangengin 3 ár;
eða
a.m.k. 15 A-landsleiki.
22 ára eða yngri og hefur leikið
a.m.k. helming af A-landsleikjum Íslands undangengin 2 ár;
eða
a.m.k. 10 A-landsleiki alls.
Stuðullinn er 7 fyrir leikmann sem nær ekki 10 en er
30 ára og hefur leikið
a.m.k. helming af A-landsleikjum Íslands undangengin 4 ár;
eða
a.m.k. 20 A-landsleiki.
29 ára eða yngri og hefur leikið
a.m.k. fjórðung af A-landsleikjum Íslands undangengin 4 ár;
eða
a.m.k. 12 A-landsleiki.
25 ára eða yngri og hefur leikið
a.m.k. fjórðung af A-landsleikjum Íslands undangengin 3 ár;
eða
a.m.k. 8 A-landsleiki.
22 ára eða yngri og hefur leikið
a.m.k. fjórðung af A-landsleikjum Íslands undangengin 2 ár;
eða
a.m.k. 4 A-landsleiki;
eða
hefur leikið a.m.k. helming af U21-landsleikjum Íslands undangengin 2 ár.
Stuðullinn er 5 fyrir leikmann sem nær ekki 7 en er
31 árs og hefur leikið
a.m.k. helming af A-landsleikjum Íslands undangengin 4 ár;
eða
a.m.k. 20 A-landsleiki.
30 ára og hefur leikið
a.m.k. fjórðung af A-landsleikjum Íslands undangengin 4 ár;
eða
a.m.k. 12 A-landsleiki.
29 ára eða yngri og hefur leikið
a.m.k. 2 af A-landsleikjum Íslands undangengin 4 ár og a.m.k. 75 leiki í Landsbankadeild;
eða
a.m.k. 4 landsleiki alls og a.m.k. 75 leiki í Landsbankadeild.
25 ára eða yngri og hefur leikið
a.m.k. 2 af A-landsleikjum Íslands undangengin 4 ár;
eða
a.m.k. 3 af A-landsleikjum Íslands;
eða
a.m.k. 5 af U21-landsleikjum Íslands og a.m.k. 40 leiki í Landsbankadeild.
22 ára eða yngri og hefur leikið
a.m.k. fjórðung af U21-landsleikjum Íslands undangengin 2 ár;
eða
1 af U21-landsleikjum Íslands undangengin 2 ár og a.m.k. 25 leiki í Landsbankadeild.
Stuðullinn er 3 fyrir leikmann sem nær ekki 5 en er
32 ára og hefur leikið
a.m.k. helming af A-landsleikjum Íslands undangengin 4 ár;
eða
a.m.k. 20 A-landsleiki.
31 árs og hefur leikið
a.m.k. fjórðung af A-landsleikjum Íslands undangengin 4 ár;
eða
a.m.k. 12 A-landsleiki.
30 ára og hefur leikið
a.m.k. 2 af A-landsleikjum Íslands undangengin 4 ár og 100 leiki í Landsbankadeild;
eða
a.m.k. 4 A-landsleikis og a.m.k. 100 leiki í Landsbankadeild.
29 ára eða yngri og hefur leikið
a.m.k. 100 leiki í Landsbankadeild;
eða
a.m.k. 50 leiki í Landsbankadeildinni, og 75 leiki í Landsbankadeild eða 1.deild.
25 ára eða yngri og hefur leikið
a.m.k. 50 leiki í Landsbankadeild;
eða
a.m.k. 25 leiki í Landsbankadeild og 50 leiki í Landsbankadeild eða 1. deild.
22 ára eða yngri og hefur leikið
a.m.k. 1 af A-landsleikjum eða U21-landsleikjum Íslands undangengin 3 ár;
eða
a.m.k. 25 leiki í Landsbankadeild, og a.m.k. 3 leiki alls með einhverju af landsliðum Íslands;
eða
a.m.k. 50 leiki í Landsbankad. eða 1. deild og a.m.k. 3 leiki alls með einhverju af landsliðum Íslands.
19 ára eða yngri og hefur leikið
a.m.k. 10 leiki í Landsbankadeild og a.m.k. 10 leiki alls með einhverju af landsliðum Íslands;
eða
a.m.k. 25 leiki í Landsbankad. eða 1. deild og a.m.k. 10 leiki alls með einhverju af landsliðum Íslands.
Stuðullinn er 1 fyrir leikmann sem nær ekki 3.
Stuðullinn er 1 fyrir allar konur.
Með leikjum í Landsbankadeild teljast leikir í 1. deild fyrir 1995, leikir í aðalkeppni bikarkeppninnar og leikir í Evrópukeppnum félagsliða.
Með leikjum í 1. deild teljast allir leikir í 2. deild fyrir 1997.
Stuðullinn uppreiknast eftir lok keppnistímabils af skrifstofu KSÍ og miðast aldur þá við næstkomandi áramót. Stuðullinn telst síðan óbreyttur til loka næsta keppnistímabils.
8. Félagi er heimilt að áfrýja flokkun leikmanns samkvæmt 7. grein til Samninga- og félagaskiptanefndar KSÍ. Skal þeirri áfrýjun fylgja rökstudd greinargerð.
9. Gildi afreksstuðulsins B fyrir leikmann, sem er ekki íslenskur ríkisborgari eða varð það fyrir innan við 4 árum síðan, skal ákvarðað af framkvæmdastjóra KSÍ. Skal hann taka mið af styrkleika leikmannsins miðað við íslenska leikmenn með hliðsjón af skilgreiningu afreksstuðulsins í grein 7. Ákvörðun framkvæmdastjóra má áfrýja til Samninga- og félagaskiptanefndar.
10. Ef ágreiningur er um félagaskiptagjald innanlands fyrir leikmann, sem áður kom frá erlendu félagi og sannanlega var þá greitt fyrir a.m.k. tvöfalt hæsta félagaskiptagjald innanlands sbr. grein 4 og 7, skal það ákvarðað af Samninga- og félagaskiptanefnd. Nefndin skal taka mið af greiðslu til erlenda félagsins og styrkleika leikmanns, en leggja jafnframt til grundvallar þau sjónarmið sem koma fram í grein 7 og þær meginreglur sem gilda í félagaskiptum milli landa og upprunalega félagaskiptagjaldið byggði á. Félagaskiptagjald ákvarðað þannig getur aldrei orðið hærra en greiðslan til erlenda félagsins var.
11. Leikmanni, sem hefur átt við meiriháttar meiðsli eða veikindi að stríða svo að hann hefur ekki getað leikið knattspyrnu í langan tíma, og telur með hliðsjón af því að afreksstuðull sinn sé metinn of hár og hindri fyrirhuguð félagaskipti sín, skal heimilt að áfrýja niðurstöðunni til lækkunar til Samninga- og félagaskiptanefndar KSÍ, sem metur hvort sanngjarnt sé að lækka stuðulinn.
12. Félag skal standa skil á félagaskiptagjöldum áður en félagaskipti taka gildi. Ef slík krafa myndast ekki fyrr en síðar, skal viðkomandi félag standa skil á félagaskiptagjöldum innan eins mánaðar frá því að krafan myndast. Skal miðað við dagsetningu undirritunar samnings. Félagi, sem verður uppvíst að því að brjóta þessar reglur til að komast hjá greiðslum, skal skylt að greiða áfallnar greiðslur með hæstu dráttarvöxtum frá þeim tíma sem greiðslan átti að gjaldfalla og KSÍ sömu upphæð í sekt.
13. Með undirritun félagaskipta samningsbundins leikmanns, sem deilur rísa út af, gengst félag undir að hlíta þeim úrskurði sem kveðinn er upp samkvæmt ákvæðum þessarar reglugerðar og reglugerðar KSÍ um samninga og stöðu félaga og leikmanna.
FÉLAGASKIPTI LEIKMANNA MILLI LANDA
E. ALMENN ÁKVÆÐI
1. Ef leikmaður hyggst leika með erlendu liði og samkomulag er um félagaskiptin við félag hans, skal það senda skrifstofu KSÍ tilkynningu um félagaskiptin á þar til gerðu eyðublaði. Í slíku tilfelli berst KSÍ beiðni frá knattspyrnusambandi erlenda félagsins um að KSÍ gefi út alþjóðlegt flutningsskírteini leikmanninum til handa. Til þess að félagaskipti geti átt sér stað gerir KSÍ kröfu um að til skrifstofu KSÍ berist félagaskiptaeyðublað, a.m.k. útfyllt með dagsetningu, nafni leikmannsins, kennitölu hans, nafni íslenska félagsins og undirritun framkvæmdastjóra þess, stjórnarmanns eða þess sem félagið veitir slíkt umboð (ekki er krafist undirritunar leikmanns né erlenda félagsins). Auk þess gengur skrifstofa KSÍ úr skugga um að uppfyllt sé það skilyrði FIFA að leikmaðurinn geti aðeins haft keppnisleyfi með tveimur félögum á 12 mánaða tímabili.
2. Félagskipti leikmanna undir 18 ára aldri eru ekki heimil milli landa. Þó er heimilt að veita undanþágu fyrir félagaskipti innan Evrópska efnahagssvæðisins ef leikmaður hefur náð 16 ára aldri og skilyrði FIFA um slík félagaskipti eru uppfyllt. Slíkri undanþágubeiðni skal beint til framkvæmdastjóra KSÍ. Ákvörðun hans er hægt að áfrýja til Samninga- og félagaskiptanefndar.
3. Leikmanni er ekki heimilt að taka þátt í keppni erlendis fyrr en KSÍ hefur gefið út flutningsskírteini fyrir hann í samræmi við reglur FIFA. Leikmanni er ekki heimilt að leika hér heima að nýju fyrr en KSÍ hefur borist flutningsskírteini og gefið út skriflegt keppnisleyfi honum til handa. Flutningsskírteini skulu vera á þar til gerðum eyðublöðum í samræmi við reglur FIFA.
KSÍ er þó heimilt að taka skeyti gild sem bráðabirgða flutningsskírteini uns formlega rétt flutningsskírteini, skv. reglum FIFA, berast KSÍ.
Ef leikmaður hefur leikið sem áhugamaður eða atvinnumaður með erlendu liði, skal líða einn dagur frá því að skrifstofa KSÍ móttekur beiðni leikmanns um félagaskipti og flutningsskírteini hefur borist uns KSÍ, að öðrum skilyrðum uppfylltum, er heimilt að gefa út keppnisleyfi honum til handa.
Félagaskipti til landsins eru aðeins heimil frá og með 15. nóvember til og með 31. maí ár hvert og á tímabilinu frá og með 15. júlí til og með 31. júlí.
Við félagaskipti úr erlendu félagsliði í íslenskt félagslið gerir KSÍ kröfu um að skrifstofu KSÍ berist félagaskiptaeyðublað, útfyllt með dagsetningu, nafni leikmanns, kennitölu (fæðingardegi) hans, undirritun leikmanns, nafni erlenda félagsins og / eða landi, nafni íslenska félagsins og undirritun framkvæmdastjóra þess, stjórnarmanns eða þess sem félagið veitir slíkt umboð. Þá skal íslenska félagið greiða skrásetningargjald. Í kjölfar þess óskar KSÍ eftir alþjóðlegu flutningsskírteini frá knattspyrnusambandi erlenda félagsins.
4. Félagi er heimilt að semja um tímabundin félagaskipti leikmanns skv. reglum FIFA. Með því að senda afrit af samkomulagi um tímabundin félagaskipti til skrifstofu KSÍ getur félag farið fram á að leikmannssamningur þess við leikmanninn sé ekki felldur úr gildi. Ef samkomulagið stendur undir slíku, að mati KSÍ, skal samningurinn halda gildi sínu.
5. Leikmaður, sem hyggst gerast atvinnumaður í knattspyrnu með erlendu félagi, skal tilkynna þá ákvörðun strax til félags síns. Með slík félagaskipti skal farið samkvæmt reglum FIFA um félagaskipti milli landa.
6. Hafi leikmaður leikið fyrir annað félag/önnur félög eitthvert af síðustu þremur heilu keppnistímabilum á Íslandi og telst keppnistímabilið standa frá 1. mars til 15. október, skal það/þau eiga hlutdeild í félagaskiptagjaldinu (á við allar bætur nema samstöðubætur).
F. SÉRÁKVÆÐI FYRIR LEIKMENN SEM ERU SAMNINGSLEIKMENN
Ef leikmaður, sem er samningsbundinn við félag, hyggst ganga til samninga um að leika með erlendu félagi skulu þeir samningar fara fram í samráði við félagið. Samningaviðræður vegna félagaskipta til erlendra félaga skulu taka mið af eftirfarandi vinnureglum.
1. Leikmaður semur sjálfur um eigin launagreiðslur.
2. Stjórn félagsins semur um félagaskiptagjald við erlenda félagið, þegar það á við.
3. Leikmaður getur samið sérstaklega við stjórn félagsins um hlutdeild í félagaskiptagjaldinu. Sú hlutdeild getur þó ekki orðið hærri en 10% af félagaskiptagjaldinu. KSÍ er í sérstökum tilvikum heimilt að leyfa hærri hlutdeild leikmanns, að undangenginni umsókn um slíkt frá félagi.
4. Uppeldisbætur eða samstöðubætur sem koma til við félagaskipti leikmanns til erlends félags skulu greiðast til uppeldsfélaga samkvæmt reglum FIFA.
5. Hafi leikmaður leikið fyrir annað félag/önnur félög eitthvert af síðustu þremur heilu keppnistímabilum á Íslandi og telst keppnistímabilið standa frá 1. mars til 15. október, skal það/þau eiga hlutdeild í félagaskiptagjaldinu (á við allar bætur nema samstöðubætur). Skipting á hluta félags skal vera þannig að félagið, sem leikmaðurinn er samningsbundinn við, skal fá endurgreiddan útlagðan kostnað vegna félagskipta innanlands, og fjórðung fjárhæðarinnar sem þá stendur eftir. Afgangurinn skal skiptast milli þeirra félaga sem leikmaður lék með undangengin þrjú ár í réttu hlutfalli við dvöl hans hjá hverju þeirra innan tímamarka keppnistímabils, sbr. ofan. Félagaskiptin skulu miðast við dagsetningu alþjóðlegs flutningsskírteinis. Þau félög sem telja sig eiga hagsmuna að gæta við félagaskiptin geta krafist nauðsynlegra gagna. Um skiptingu félagaskiptagjalds vegna tímabundinna félagaskipta, skv. gr. E4 gilda sömu reglur og um varanleg félagaskipti. Sé hins vegar hluti félagaskiptagjaldsins ætlaður til þess að greiða laun leikmannsins erlendis á meðan á hinum tímabundnu félagaskiptum stendur er heimilt að draga þann hluta gjaldsins frá áður en að gjaldinu er skipt enda leiði sú launagreiðsla ekki til þess að greiðslur lækki til leikmannsins skv. samningi hans við íslenska félagið. Ef ágreiningur verður um skiptinguna skal félagi skylt að leggja leigusamning og önnur nauðsynleg fylgiskjöl fyrir Samninga- og félagaskiptanefnd, sem skipar trúnaðarmann til að yfirfara þau.
6. Ef leikmaður telur að stjórn félagsins sýni óbilgirni í samningum og hindri með því möguleg félagaskipti til erlends félags getur hann áfrýjað til stjórnar KSÍ sem skipar oddamann til að miðla málum.
7. Gangi leikmaður, sem var samningsbundinn félagi á Íslandi og gekk til liðs við erlent félag án þess að félagaskiptagjald væri greitt, til liðs við annað félag á Íslandi innan árs eftir að samningi hans við íslenska félagið lauk, skal nýja félagið greiða félagaskiptagjald samkvæmt kafla D til þess félags sem hann var samningsbundinn við áður, nema það hafi greitt sambærilegt félagaskiptagjald til erlenda félagsins.
SKRÁNING IÐKENDA OG SKRÁSETNINGARGJALD
G. SKRÁNING IÐKENDA OG SKRÁSETNINGARGJALD
1. Félög innan vébanda KSÍ skulu skrá iðkendur sína í knattspyrnu í iðkendaskrá KSÍ eigi síðar en frá því almanaksári sem þeir verða 9 ára.
2. Skrifstofa KSÍ skal halda skrá yfir alla knattspyrnuiðkendur í félögum innan vébanda KSÍ og félagaskipti þeirra.
3. Þegar leikmaður skiptir um félag, hvort heldur það er á milli félaga innanlands eða á milli landa, skal skrásetningargjald fylgja tilkynningu um félagaskipti til skrifstofu KSÍ.
4. Gjaldið skal vera kr. 1500 fyrir leikmenn 1. og 2. aldursflokks, en kr 750 fyrir 3. flokk og yngri og breytast um hver áramót í samræmi við væntanlegar breytingar á aðgöngumiðaverði í Landsbankadeild karla.
Samþykkt á ársþingi KSÍ 1996, með breytingum 1997 - 2006.
