Miniknattspyrna
REGLUGERÐ KSÍ UM MINIKNATTSPYRNU
1. gr. ALMENN ÁKVÆÐI
Allir leikir skulu fara fram skv. knattspyrnulögum KSÍ og reglugerð KSÍ um knattspyrnumót, nema annars sé getið í reglugerð þessari.
2. gr. LEIKVÖLLURINN
Stærð leikvallar miðast við að leikið sé þversum á venjulegum leikvelli, sbr. 1. gr. knattspyrnulaga.
Viðmiðunarstærð: 68 m x 52,5m
Hámarksstærð: 75 m x 55m
Lágmarksstærð: 55 m x 40m
KSÍ getur heimilað frávik frá þessum stærðarmörkum.
Leikvöllur og merking hans skal vera í samræmi við eftirfarandi lýsingu:
Vítateigur: Á hvorn enda leikvallar skal merkja tvær línur hornrétt á
marklínu 10 m frá hvorri marksúlu og skulu þær ná 10 m inná
leikvöllinn. Þær skulu tengjast saman með línu, sem merkt skal samsíða
marklínu. Hvort svæðið um sig innan þessara lína og marklínu, nefnist
vítateigur. Vítateigur er einnig markteigur.
Vítamerki skal merkt fyrir miðju marki 8 m frá marklínu.
Vallarmiðja: Kross skal markaður mitt á milli marklína, fyrir þeim
miðjum til að marka miðju vallarins.
Mörkin: Mörkin skulu sett á miðju hvorrar marklínu. Milli marksúlna
skal vera 5 m (innanmál) og frá jörðu að markslá skulu vera 2 m.
3. gr. TALA LEIKMANNA
Hvort lið skal eigi skipað fleiri en sjö leikmönnum og skal einn vera markmaður. Skiptimenn skulu eigi vera fleiri en fimm. Skipti á leikmönnum skulu fara fram fyrir miðri hliðarlínu vallarins og mega fara fram hvenær sem er í leiknum. Skiptimanni er því heimilt að ganga til leiks þegar einhver leikmaður í liði hans hefur yfirgefið leikvöllinn fyrir miðri hliðarlínu án þess að tilkynna dómaranum um það. Leikmaður, sem skipt hefur verið út af leikvelli, má ganga til leiks á ný.
Lið, sem mætir með færri en 5 leikmenn til leiks, getur ekki hafið leikinn og telst ekki hafa mætt til leiks.
Ef leikmanni er vikið af leikvelli í 5. flokki eða í yngri flokkum getur viðkomandi leikmaður ekki tekið frekari þátt í leiknum en heimilt er að skipta öðrum leikmanni inn á í hans stað. Í eldri aldursflokkum er óheimilt að skipta öðrum leikmanni inn á í stað leikmanns sem vikið hefur verið af leikvelli.
4. gr. LEIKSKÝRSLUR
KSÍ skal gefa út sérstök leikskýrslueyðublöð í miniknattspyrnu. Annars vegar eyðublað fyrir nöfn leikmanna sem félagið skilar í mótslok og hins vegar eyðublað þar sem greint er frá úrslitum leikja og heimaliði ber að skila að leik loknum. Mótanefnd setur nánari reglur um skýrslur þessar ef þörf krefur.
5. gr. DÓMGÆSLA
Aðstoðardómara er ekki krafist í miniknattspyrnu.
6. gr. LEIKTÍMI
Í reglugerð KSÍ um knattspyrnumót er getið um leiktíma í einstökum flokkum. Heimilt er að stytta leiktíma í hraðmótum.
7. gr. UPPHAFSSPYRNA
Upphafsspyrna skal tekin á miðju og er heimilt að spyrna í hvaða átt sem er.
8. gr. RANGSTAÐA
Í miniknattspyrnu geta leikmenn ekki verið rangstæðir, sbr. 11. grein. knattspyrnulaga.
9. gr. LEIKBROT OG YFIRSJÓNIR - AUKASPYRNUR
Fyrir öll brot í 12. grein knattspyrnulaga skal refsað með beinni aukaspyrnu með þeim undantekningum að markverði í 5. flokki og yngri aldursflokkum skal heimilt að taka knöttinn upp með höndum eftir sendingu frá samherja og jafnframt skal honum heimilt að halda knettinum lengur en í 6 sek. Þegar leikmaður tekur aukaspyrnu skulu allir mótherjar hans vera í a. m. k. 6 m fjarlægð frá knettinum, þar til hann er kominn í leik. Í aukaspyrnu innan vítateigs í 5. flokki og yngri aldursflokkum má leika knettinum til markvarðar án þess að knötturinn hafi farið út fyrir vítateig.
10. gr. VÍTASPYRNA
Vítaspyrnu skal taka 8 m frá marklínu fyrir miðju marki.
11. gr. MARKSPYRNA
Í 5. flokki og yngri aldursflokkum má leika knettinum til markvarðar án þess að knötturinn hafi farið út fyrir vítateig.
12. gr. HORNSPYRNA
Í 6. flokki og yngri aldursflokkum er hornspyrna tekin þar sem vítateigur og marklína skerast. Annars er hornspyrna tekin þar sem marklína og hliðarlína skerast.
13. gr. INNKAST
Í 5. flokki og yngri aldursflokkum má markvörður taka knöttinn upp með höndum eftir innkast frá samherja.
Samþykkt á ársþingi KSÍ 1985 með breytingum 1986 - 2006.
