Samningar leikmanna
REGLUGERÐ KSÍ UM SAMNINGA OG STÖÐU FÉLAGA OG LEIKMANNA
A ALMENN ÁKVÆÐI OG SKILGREININGAR
1. Knattspyrnumenn á Íslandi eru annað hvort áhugamenn eða samningsleikmenn.
a. Áhugamaður/Sambandsleikmaður (amateur): Leikmaður sem hefur keppnisleyfi með félagi. Greiðslur til hans geta aðeins náð yfir beinan útlagðan ferða-, fæðis- og dvalarkostnað vegna leikja og kostnað við útbúnað, tryggingar, æfingar og keppni. Heimilt er að gera sérstakan samning við áhugamann, og kallast hann þá sambandsleikmaður og samningurinn sambandssamningur. Sambandsleikmanni er að vissu marki heimilt að taka við greiðslum tengdum árangri. Heildargreiðslur vegna sambandsleikmanns og til hans mega ekki fara út fyrir ramma þessarar reglugerðar og aldrei fara yfir 300.000 kr. á ári.
b. Samningsleikmaður (professional): Leikmaður sem gerir samning við félag sem heimilar honum að taka við almennum greiðslum fyrir knattspyrnuiðkun, svo sem vegna vinnutaps, fyrirhafnar eða árangurs. Samningurinn kallast leikmannssamningur.
2. Einungis KSÍ-umboðsmenn, sem hafa starfsleyfi samkvæmt reglugerð KSÍ (Reglugerð KSÍ fyrir umboðsmenn leikmanna), eða umboðsmenn með starfsleyfi frá öðru knattspyrnusambandi innan FIFA, mega starfa sem umboðsmenn félags eða leikmanns við félagaskipti. Jafnframt skulu þeir starfa samkvæmt Reglugerð KSÍ um félagaskipti og Reglugerð KSÍ um samninga og stöðu félaga og leikmanna. Brot á þessu varðar viðurlögum samkvæmt ákvæðum sömu reglugerðar.
3. Leikmanni sem er jafnframt þjálfari er heimilt að taka greiðslu fyrir störf sín sem slík.
B. SAMNINGSFORM OG SAMNINGSLENGD
1. Samningur við leikmann skal vera skriflegur og skal hann gerður á staðalformi frá KSÍ, sem innifelur ákvæði um skyldur félags og leikmanns, hvort sem um sambandssamning eða leikmannssamning er að ræða. Samningnum geta fylgt fylgiskjöl sem kveða á um greiðslur til leikmanns og sektarákvæði við brot á samningi samkvæmt samkomulagi félags og leikmanns, tryggingar, útbúnað og fleira. Allra fylgiskjala með samningi skal getið á staðalformi, ella teljast þau ekki bindandi hluti samnings. Ekki er heimilt að tímamörk fylgiskjals séu víðari en tímamörk staðalformsins. Kvaðir byggðar á slíkum grunni skulu teljast marklausar.
2. Sambandssamningur (amateur contract) (sjá kafla H): Öll félög geta gert sambandssamning við leikmann. Sambandssamning er ekki heimilt að gera til lengri tíma en tveggja keppnistímabila.
3. Leikmannssamningur (professional contract) (sjá kafla H): Aðeins félögum í Landsbankadeild eða 1. deild karla og Landsbankadeild kvenna er heimilt að gera leikmannssamning. Leikmannssamning er heimilt að gera til allt að fimm keppnistímabila í Landsbankadeild karla, en þriggja keppnistímabila í 1. deild karla og Landsbankadeild kvenna, sbr. þó næstu grein.
4. Heimilt er að gera samning við leikmann frá og með því almanaksári sem hann verður 16 ára. Ef leikmaður er ekki orðinn 18 ára skal forráðamaður hans einnig undirrita samninginn til að hann taki gildi. Ekki er heimilt að gera lengri samning en til þriggja keppnistímabila við leikmann sem er yngri en 18 ára.
5. Óheimilt er að setja inn í samninga eða fylgiskjöl þeirra ákvæði sem takmarka rétt félags við félagaskipti.
6. Frumrit fullfrágengins samnings við leikmann skal senda skrifstofu KSÍ til skráningar en leikmaður og félag skulu fá sitt afritið hvort eftir undirskrift. Sé samningur ekki gerður skv. 1. grein þessa kafla telst leikmaður ekki samningsbundinn.
7. Á því ári sem samningur rennur út skal það gerast á tímabilinu 16. október - 31. desember.
C. STAÐA FÉLAGS SEM GERIR LEIKMANNSSAMNING
1. Félag sem gerir leikmannssamning kallast samningsfélag (professional club).
2. Félag, sem gerir leikmannssamning, skuldbindur sig til að hlíta reglum KSÍ um félagaskipti leikmanna. Jafnframt skuldbindur félagið sig til þess að hafa ekki samband við samningsbundinn leikmann nema að fengnu leyfi frá viðkomandi félagi. Þó er heimilt að ræða við samningsbundinn leikmann eftir 15. október án leyfis viðkomandi félags, ef samningur hans rennur út eigi síðar en um næstu áramót.
3. Félag, sem gerir leikmannssamning við leikmann, skal senda skrifstofu KSÍ undirritað staðalform samnings ásamt öllum fylgiskjölum til skráningar. Skal það gert innan mánaðar frá undirritun. Áður skal félag standa skil á þeim kröfum sem myndast við undirritun samnings. Félag, sem lætur ekki skrá samning innan tilsettra tímamarka, missir allan kröfurétt sem samningurinn veitir, en leikmaðurinn heldur sínum kröfurétti. Félagið skal skila inn upplýsingum um leikjafjölda viðkomandi leikmanns með félagsliðum og landsliðum til að auðvelda ákvörðun um afreksstuðul hans.
4. Félagi, sem gerir samning við leikmann, er skylt að kynna leikmanninum innhald hans áður en skrifað er undir hann.
5. Heimilt er að semja sérstaklega um að leikmannssamningur falli úr gildi eftir lok keppnistímabils ef félag fellur niður í 1. deild karla. Slíks skal þá getið í samningnum. Uppsögn byggð á þessu skal berast hinum samningsaðilanum skriflega fyrir 1. nóvember og afrit sendast skrifstofu KSÍ og tekur hún þá strax gildi. Ef félag fellur niður í 2. deild karla eða 1. deild kvenna skulu allir leikmannssamningar þess renna út í lok keppnistímabils án nokkurrar ábyrgðar fyrir hvorn aðila og félagið missir heimild til að gera leikmannssamninga. Þetta hefur þó ekki áhrif á reglur um félagaskipti.
D. STAÐA FÉLAGS SEM GERIR SAMBANDSSAMNING
1. Félag sem gerir sambandssamning við einn eða fleiri leikmenn en ekki leikmannssamning kallast sambandsfélag (amateur club).
2. Félag, sem gerir sambandssamning, skuldbindur sig til að hlíta reglum KSÍ um félagaskipti leikmanna. Jafnframt skuldbindur félagið sig til þess að hafa ekki samband við samningsbundinn leikmann nema að fengnu leyfi frá viðkomandi félagi. Þó er heimilt að ræða við samningsbundinn leikmann eftir 15. október án leyfis viðkomandi félags, ef samningur hans rennur út eigi síðar en um næstu áramót.
3. Félag, sem gerir sambandssamning við leikmann, skal senda skrifstofu KSÍ undirritað staðalform samnings ásamt öllum fylgiskjölum til skráningar. Skal það gert innan mánaðar frá undirritun. Áður skal félag standa skil á þeim kröfum sem myndast við undirritun samnings. Félag, sem lætur ekki skrá samning innan tilsettra tímamarka, missir allan kröfurétt sem samningurinn veitir, en leikmaðurinn heldur sínum kröfurétti. Samning er ekki unnt að fá skráðan á tímabilinu 1. ágúst til áramóta, nema hann nái einnig yfir næsta keppnistímabil. Félagið skal skila inn upplýsingum um leikjafjölda viðkomandi leikmanns með félagsliðum og landsliðum til að auðvelda ákvörðun um afreksstuðul hans.
4. Félagi, sem gerir samning við leikmann, er skylt að kynna leikmanninum innhald hans áður en skrifað er undir hann.
5. Heimilt er að semja sérstaklega um að sambandssamningur falli úr gildi eftir lok keppnistímabils ef félag fellur niður niður um deild. Slíks skal þá getið í skráðu fylgiskjali með samningi. Uppsögn byggð á þessu skal berast hinum samningsaðilanum skriflega fyrir 1. nóvember og afrit sendast skrifstofu KSÍ og tekur hún þá strax gildi.
E. STAÐA LEIKMANNA
1. Leikmönnum í Landsbankadeild og 1. deild karla og í Landsbankadeild kvenna er heimilt að gera leikmannssamning við félag, en öllum leikmönnum er heimilt að gera sambandssamning við félag. Samningarnir geta eingöngu verið samkvæmt ákvæðum þessarar reglugerðar.
2. Samningur leikmanns skal gerður á staðalformi frá KSÍ, sem innifelur ákvæði um skyldur félags og leikmanns. Samningnum geta fylgt fylgiskjöl sem kveða á um greiðslur til leikmanns og sektarákvæði við brot á samningi samkvæmt sérstöku samkomulagi félags og leikmanns, tryggingar, útbúnað og fleira. Fylgiskjöl með samningi skulu skráð á staðalform, ella teljast þau ekki bindandi hluti samnings.
3. Leikmaður, sem hefur gert samning við félag, getur ekki skipt um félag innanlands á samningstímanum, nema til komi sérstakt leyfi félagsins. Leikmanni, sem er með samning sem rennur út fyrir næstu áramót, er heimilt að skrifa undir félagaskipti, samkvæmt reglugerð KSÍ um félagaskipti leikmanna, eftir 15. október. Eftir að hann hefur skrifað undir félagaskiptin er honum heimilt að skrifa undir samning við nýtt félag.
4. Leikmanni er ekki heimilt að gera samning við félag fyrr en á því almanaksári sem hann verður 16 ára. Ef hann er yngri en 18 ára skal samningurinn einnig staðfestast af forráðamanni hans. Leikmanni yngri en 18 ára er ekki heimilt að gera lengri samning en til þriggja keppnistímabila.
5. Leikmaður sem gerir samninga við fleiri en eitt félag sem ná yfir sama tímabil skal settur í keppnisbann af framkvæmdastjóra KSÍ þar til málið hefur verið leyst.
F. SAMNINGA- OG FÉLAGASKIPTANEFND KSÍ
1. Samninga- og félagaskiptanefnd KSÍ skal skipuð þrem mönnum og þrem til vara. Einn nefndarmanna og einn varamanna skulu vera lögfræðingar. Stjórn KSÍ sér um tilnefningu nefndarmanna. Starfsmenn KSÍ annast daglegan rekstur málefna nefndarinnar undir stjórn framkvæmdastjóra KSÍ. Nefndarmenn skulu víkja ef ákvarðanataka snertir hagsmuni þeirra eigin félags.
2. Skrifstofa KSÍ skal fá frumrit af undirrituðum leikmannssamningum og sambandssamningum á staðalformi KSÍ og félagaskiptum og sjá um skráningu á þeim. Sérhverjum samningi skal fylgja afrit af öllum fylgiskjölum hans. Framkvæmdastjóri KSÍ er ábyrgur fyrir því að fyllsta trúnaðar og öryggis sé gætt við vörslu þeirra á vegum KSÍ. Skrifstofa KSÍ getur hafnað samningi vegna formgalla og skal þá báðum samningsaðilum tilkynnt um það. Skrifstofunni er einnig heimilt að veita allt að 2 vikna viðbótarskráningartíma til að bæta úr formgöllum. Áður en samningur er skráður skal félagið sýna fram á að það hafi staðið í skilum vegna þeirra krafna sem mynduðust við undirritun samnings, ella skal skráningu samnings hafnað og báðum samningsaðilum tilkynnt um það. Nefndin skal hafa aðgang að öllum fylgiskjölum með samningi ef hún telur þess þörf vegna ágreiningsmála sem til nefndarinnar koma.
3. Skrifstofa KSÍ skal halda skrá um alla samningsleikmenn og sambandsleikmenn. Þar skal koma fram aldur leikmanns, lengd samningstímabils, afreksstuðull hans samkvæmt Reglugerð KSÍ um félagaskipti leikmanna og fyrri félög. Skráin skal birt á heimasíðu KSÍ og skal skrifstofa KSÍ uppfæra afreksstuðla einu sinni á ári í lok nóvember. Leiki landslið í desember sama ár skal skráin uppfærð miðað við það.
4. Skrifstofa KSÍ skal halda skrá um umboðsmenn og geyma afrit af samningum þeirra við leikmenn, samanber Reglugerð KSÍ um umboðsmenn leikmanna.
5. Framkvæmdastjóri KSÍ skal ákvarða afreksstuðul leikmanna, sem eru ekki íslenskir ríkisborgarar eða voru ekki orðnir það fyrir 4 árum. Skal hann taka mið af styrkleika leikmannsins miðað við íslenska leikmenn með hliðsjón af skilgreiningu afreksstuðulsins í grein D 7 í sérákvæðum um félagaskipti innanlands fyrir leikmenn sem eru eða hafa verið samningsbundnir.
6. Ef ágreiningur er vegna ákvörðunar framkvæmdastjóra KSÍ, sbr. grein F 5, getur félag áfrýjað flokkun leikmanns til nefndarinnar og skal það gert eigi síðar en 1. mars árið eftir. Áfrýjun skal fylgja rökstudd greinargerð.
7. Ef leikmaður, sem hefur verið samningsbundinn en átt við langvarandi meiðsli eða veikindi að stríða og telur með hliðsjón af því að afreksstuðull sinn, samkvæmt grein D 7 í reglugerð um félagaskipti leikmanna innanlands, sé metinn of hár og hindri þar með fyrirhuguð félagaskipti sín, getur hann beint skriflegri ósk um endurmat á afrekstuðlinum til nefndarinnar og skal hún meta hvort sanngjarnt sé að lækka afreksstuðul leikmannsins og þá hve mikið.
8. Við ákvörðun á félagaskiptagjaldi fyrir leikmann, sem áður kom frá erlendu félagi og sannanlega var þá greitt fyrir a.m.k. tvöfalt hæsta félagaskiptagjald innanlands sbr. reglugerð KSÍ um félagaskipti, skal nefndin taka mið af greiðslu til erlenda félagsins og styrkleika leikmanns. Jafnframt skal hún leggja til grundvallar þau sjónarmið sem koma fram í grein C 7 í sérákvæðum um félagaskipti innanlands fyrir leikmenn sem eru eða hafa verið samningsbundnir og þær meginreglur sem gilda í félagaskiptum milli landa og upprunalega félagaskiptagjaldið byggði á. Félagaskiptagjald ákvarðað þannig getur aldrei orðið hærra en greiðslan til erlenda félagsins var.
9. Ef ágreiningsefni koma upp milli félags og leikmanns vegna túlkunar á samningsatriðum skal nefndin leysa úr ágreiningi aðila. Kröfur skulu vera skýrar og lagðar fram skriflega. Nefndin tekur afstöðu til ágreiningsefnisins með úrskurði eftir að hafa gefið aðilum kost á að gera kröfur, færa fram sönnunargögn, kynna sér gögn málsins og tjá sig um sakarefni. Gæta skal jafnræðisreglu. Hvor aðili fyrir sig getur þó farið fram á að ágreiningurinn verði lagður í gerð, sbr. lög nr. 53 frá 1989 um samningsbundna gerðardóma, og skal krafa um slíkt lögð fram skriflega áður en nefndin tekur málið til efnislegrar meðferðar. Skal hvor aðili þá skipa einn mann í gerðardóm og skal dómstóll KSÍ skipa oddamann. Niðurstaða um ágreiningsefnið er endanleg og bindandi fyrir báða deiluaðila.
10. Ágreining milli íslenskra félaga við félagaskipti, m. a. um greiðslur, skal leggja fyrir Samninga- og félagaskiptanefnd og skal málsmeðferð vera með sama hætti og fram kemur í F. 9. Úrskurður nefndarinnar er endanlegur. Ágreining við erlent félag er þó hægt að leggja fyrir FIFA.
11. Ef ágreiningur er vegna ákvörðunar framkvæmdastjóra KSÍ vegna beiðni um undanþágu fyrir félagaskipti milli landa fyrir leikmenn yngri en 18 ára, sbr. grein E2 í Reglugerð KSÍ um félagaskipti leikmanna, skal nefndin úrskurða í málinu. Málsferð skal vera með sama hætti og í F9. Úrskurður nefndarinnar er endanlegur.
12. Samninga- og félagaskiptanefnd setur sér nánari starfsreglur sem samþykktar skulu af stjórn KSÍ.
G. SKRÁNINGARGJALD SAMNINGA
1. Greiða skal KSÍ gjald vegna skráningar samninga. Gjaldið skal vera krónur 1500 fyrir nýskráningu samnings félags við leikmann, en krónur 500 fyrir skráningu vegna endurnýjunar á samningi félags við leikmann. Gjald vegna nýskráningar telst jafnframt skráningargjald fyrir félagaskipti ef félagaskipti eru undanfari samnings. Gjaldið skal breytast um hver áramót í samræmi við væntanlegar breytingar á aðgöngumiðaverði í Landsbankadeild karla.
H. VIÐURLÖG VIÐ BROTUM
1. Ef félag verður uppvíst að broti á reglugerð þessari þá er Samninga- og félagskiptanefnd heimilt að beita eftirfarandi refsingum (einni eða fleiri saman):
a. áminningu,
b. sekt, allt að fimmföldu grunngjaldi félagaskipta,
c. svipta félagið rétti til að gera nýja samninga í allt að eitt keppnistímabil.
I. STAÐALSAMNINGUR KSÍ
__Leikmannssamningur __Sambandssamningur
Félagið _____________________________________, hér eftir nefnt félag, og ________________________ ______________________, leikmaður félagsins, hér eftir nefndur leikmaður, gera með sér eftirfarandi samning, samanber reglugerð KSÍ um samninga og stöðu félaga og leikmanna, sem frá _______________ til _______________ (dagsetning). Athugið að leikmannssamningur getur aldrei náð yfir skemmra tímabil en eitt keppnistímabil og að allir samningar verða að renna út á tímabilinu 16. október - 31. desember.
1. Skyldur leikmanns
a. Leikmaður skuldbindur sig til að æfa og leika knattspyrnu með félagi sínu á samningstímanum samkvæmt ákvörðunum stjórnar þess, og taka þátt í sameiginlegum verkefnum leikmanna félagsins í samráði við stjórn þess. Öll forföll skal leikmaður tilkynna stjórn félagsins eða fulltrúa hennar (þjálfara).
b. Leikmaður skal fylgja í einu og öllu þeim reglum, sem settar eru um undirbúning leikja, og nota þann útbúnað sem félagið fer fram á að verði notaður.
c. Leikmaður skal gæta þess að öll framkoma hans og talsmáti séu félaginu sæmandi og til framdráttar jákvæðri ímynd félagsins.
d. Leikmanni er óheimilt að gera sjálfstæðan auglýsingasamning án samráðs við stjórn félagsins.
e. Leikmanni er óheimilt að æfa, keppa, þjálfa eða sýna knattspyrnu á vegum annars aðila en félagsins á samningstímanum án leyfis stjórnar þess. Þó skal honum ævinlega heimil þátttaka í verkefnum á vegum KSÍ, sbr. samstarfsreglur milli KSÍ og aðildarfélaga um þátttöku leikmanna í leikjum og æfingum á vegum KSÍ. Leikmanni er ekki heimilt að æfa eða taka þátt í öðrum íþróttagreinum en knattspyrnu án sérstaks leyfis stjórnar félagsins, sem setur viðeigandi skilyrði.
f. Leikmaður getur ekki gert frekari kröfur um greiðslur en fram koma í samningi þessum eða skráðum fylgiskjölum hans. Fyrir sambandssamning geta greiðslur náð yfir beinan útlagðan ferða-, fæðis- og dvalarkostnað vegna leikja, kostnað við útbúnað, tryggingar, æfingar og keppni og umbun tengda árangri, þó þannig að heildarupphæð á greiðslum vegna og til leikmanns má ekki vera hærri en 300.000 kr.
g. Á samningstímanum má leikmaður ekki, án leyfis stjórnar félagsins, ganga til samninga við önnur íslensk eða erlend félög eða umboðsmenn þeirra. Viðræður við íslensk félög geta þó farið fram eftir 15. október, ef samningur rennur út fyrir árslok. Ef leikmaður hyggst gera samning við erlent félag skulu samningsviðræður fara fram í samráði við stjórn félagsins.
2. Skyldur félags
a. Félagið skal leitast við að sjá leikmönnum fyrir sem bestri aðstöðu til æfinga og keppni þeim að kostnaðarlausu.
b. Félagið skal gæta þess að þjálfarar þess stundi starf sitt á þann hátt að það skili leikmönnum og félaginu sem mestum árangri.
c. Félagið skal vísa leikmanni, sem verður fyrir meiðslum við æfingar eða keppni á þess vegum eða KSÍ, til hæfs læknis eða sjúkraþjálfara. Félagið skal greiða þann kostnað, sem leikmaður þyrfti að bera vegna meðferðarinnar og ekki greiðist af almannatryggingum eða tryggingafélögum, ef leikmaður fylgir leiðsögn félagsins um lækni og sjúkraþjálfara, enda sé slík meðferð bein afleiðing meiðsla við æfingar eða keppni á vegum félagsins eða KSÍ. Samningsfélag skal sjá til þess að á leikjum meistaraflokks sé til taks læknir, hjúkrunarfræðingur eða sjúkraþjálfari.
d. Félagið skal sjá um að leikmaður fái leikmannapassa, sem gildir á alla leiki í viðkomandi deild.
e. Samningsfélag skal útvega leikmanni nauðsynlegan útbúnað til æfinga og keppni. Sambandsfélag skal útvega leikmanni helsta útbúnað til æfinga og keppni.
f. Félagið skal ganga frá tryggingu fyrir leikmanninn, sem nær yfir slys og meiðsli við æfingar, keppni, ferðir og starf í tengslum við félagið og KSÍ, sem tryggir leikmanninum slysadagpeninga, örorkubætur og e.t.v. dánarbætur samkvæmt eftirfarandi:
g. Í einstökum tilvikum er stjórn félagsins hvött til að gera undantekningu frá reglum hvað varðar greiðslur vegna félagaskipta samningsbundinna leikmanna. Þetta á einkum við þegar mjög persónulegar aðstæður valda félagaskiptum, t.d. ef leikmaður fer erlendis til náms, eða við flutninga vegna breyttra persónulegra haga. Slíkar undantekningar eru þó í öllum tilvikum háðar mati stjórnar félagsins, sem er heimilt að setja viðeigandi skilyrði.
h. Leikmaður skal fá afrit af samningi þessum að lokinni undirskrift.
3. Almenn ákvæði
a. Leikmannssamning er heimilt að gera til allt að fimm keppnistímabila í Landsbankadeild karla, en þriggja keppnistímabila í 1. deild karla og Landsbankadeild kvenna. Þó er aldrei heimilt að gera lengri samning en til þriggja keppnistímabila við leikmenn sem eru yngri en 18 ára. Sambandssamning er ekki heimilt að gera til lengri tíma en tveggja keppnistímabila.
b. Óheimilt er að setja inn í samninginn eða viðauka við hann ákvæði sem takmarka rétt félags við félagaskipti. Leikmanni er heimilt að semja sérstaklega um hlutdeild í félagaskiptagjaldi við félagaskipti milli landa. Samkvæmt samningi þessum skal hlutur leikmanns vera ______ % (mest 10%, nema fyrir liggi sérstök heimild frá KSÍ um slíkt).
c. Báðir aðilar gangast undir að virða lög og reglugerðir KSÍ í hvívetna. Ef ágreiningsefni koma upp um túlkun eða gildi samningsins skal reyna að leysa ágreininginn innan félagsins. Ef slíkt dugar ekki skal Samninga- og félagaskiptanefnd leysa úr ágreiningi aðila. Kröfur skulu vera skýrar og lagðar fram skriflega. Nefndin tekur afstöðu til ágreiningsefnisins með úrskurði eftir að hafa gefið aðilum kost á að gera kröfur, færa fram sönnunargögn, kynna sér gögn málsins og tjá sig um sakarefni. Gæta skal jafnræðisreglu. Hvor aðili fyrir sig getur þó farið fram á að ágreiningurinn verði lagður í gerð, sbr. lög nr. 53 frá 1989 um samningsbundna gerðardóma, og skal krafa um slíkt lögð fram skriflega áður en nefndin tekur málið til efnislegrar meðferðar. Skal hvor aðili þá skipa einn mann í gerðardóm og skal dómstóll KSÍ skipa oddamann. Niðurstaða um ágreiningsefnið er endanleg og bindandi fyrir báða deiluaðila.
d. Ef annar hvor samningsaðili verður uppvís að því að brjóta ákvæði samnings þessa í mikilvægum atriðum, getur hinn aðilinn rift honum.
e. Heimilt er að semja sérstaklega um að samningurinn falli úr gildi ef félagið fellur niður um deild. Slíks skal þá getið í skráðu fylgiskjali með samningi. Uppsögn byggð á þessu skal berast hinum samningsaðilanum skriflega fyrir 1. nóvember og afrit sendast skrifstofu KSÍ og tekur hún þá strax gildi. Ef samningsfélag fellur niður í 2. deild karla eða 1. deild kvenna skulu allir leikmannssamningar skilyrðislaust renna út í lok keppnistímabils án nokkurrar ábyrgðar fyrir hvorn aðila.
f. Aðilar geta hvenær sem er orðið sammála um að leysa hvorn annan frá samningi þessum, þó skal líða a.m.k. 1 mánuður frá undirskrift samnings áður en slíkt tekur gildi. Upplýsingar um slíkt skulu strax sendar skrifstofu KSÍ.
4. Annað (laun, hlunnindi, sektarákvæði o.fl.)
5. Fylgiskjöl með samningi.
Hér á eftir skal skrá öll fylgiskjöl sem tilheyra samningi þessum og um hvað þau fjalla.
Fylgiskjal 1: _________________________________________________
Fylgiskjal 2: _________________________________________________
Fylgiskjal 3: _________________________________________________
Undirritaðir staðfesta samning þennan með undirskrift sinni og votta jafnframt að þeir hafa kynnt sér innihald hans:
______________________ ______________________
Staður Dagsetning Staður Dagsetning
_______________________ _______________________
Undirskrift leikmanns Undirskrift félags
_______________________ _______________________
Kennitala leikmanns Kennitala félags
_______________________
Undirskrift forráðamanns
_______________________ _______________________
Kennitala forráðamanns Heimilsfang leikmanns
Umboðsmaður leikmanns tók þátt í samningsgerð: __Já __Nei
Ef já:
_______________________
Undirskrift umboðsmanns
_______________________ _______________________
Kennitala umboðsmanns Heimilsfang umboðsmanns
Móttekið af Samninga- og félagaskiptanefnd KSÍ:
___________________________________________________
Staður Dagsetning Undirskrift
Minnt er á að samningurinn ásamt fylgiskjölum skal skráður hjá skrifstofu KSÍ innan mánaðar frá undirritun. Áður en samningur er skráður skal félagið sýna fram á að það hafi staðið í skilum vegna þeirra krafna sem mynduðust við undirritun samnings, ella verður skráningu samnings hafnað. Félag, sem lætur ekki skrá samning innan tilsettra tímamarka, missir allan kröfurétt sem samningurinn veitir, en leikmaðurinn heldur sínum kröfurétti.
Samþykkt á ársþingi KSÍ 1996, með breytingum 1997 - 2006.
