Þung mörk í knattspyrnuhúsum
Umsögn mannvirkjanefndar KSÍ
Mannvirkjanefnd KSÍ hefur borist erindi frá KRR - Knattspyrnuráði Reykjavíkur varðandi mörkin í Egilshöll, sem þykja orðin afar þung og erfið í færslu.
Samkvæmt upplýsingum frá núverandi rekstraraðila Egilshallar, mun fyrri eigandi hallarinnar hafa látið þyngja mörkin vegna athugasemda frá óskilgreindum eftirlitsaðila á vegum Reykjavíkurborgar. Hann hafði krafist þess að þau skyldu þyngd og vitnaði hann í alþjóðlegan staðal ÍST EN 748: 1995 og viðbót A1 1998. Vegna þessara athugasemda hafði verið ákveðið að steypa í botnramma markanna til að ná ásættanlegri ballest, til að hindra hættuna á að mörkin féllu fram yfir sig með tilheyrandi slysahættu.
Mannvirkjanefnd KSÍ hefur kynnt sér framangreindan staðal með tilliti til krafna sem þar eru settar varðandi öryggiskröfur sem lúta að knattspyrnumörkum. Nefndin hefur og kynnt sér samsvarandi kröfur sem fram koma í reglugerð enska knattspyrnusambandsins frá 2003, The Football Association Goals for football Technical details, sem byggir á BS EN 748 (breski staðallinn) að ábendingu frá Staðalráði.
Í kafla 4 í ÍST EN 748 um öryggiskröfur segir m.a. í lið 4.4 um stöðugleika, að mörk sem eru prófuð í samræmi við lið 5.3.1, skuli ekki falla fram yfir sig eða renna. Samkvæmt lið 5.3.1, er 1100 N láréttur þrýstingur settur ofan á miðja þverslá marks í eina mínútu +/-10 sek með 3 m löngu reipi. Breski staðallinn hefur sömu viðmið. Samkvæmt breska staðlinum eru minni kröfur gerðar til marka úr plasti sem vega minna en 18 kg, en þar er viðmiðið 300 N. Í bresku útgáfunni er og ákvæði um að í frístandandi mörkum skuli fjarlægð frá markstöngum að bakbotnstöng vera meiri eða jafnt og 80% af hæð marksins.
Mannvirkjanefnd KSÍ er ekki kunnugt um hvort þessum ofangreindu prufuaðferðum hafi verið beitt, þegar ákveðið var að þyngja mörkin í Egilshöll, en það ætti að vera einfalt mál að framkvæma slíkt próf.
Sammerkt báðum stöðlum eru kröfur um varúðarmerkingar á knattspyrnumörkum. Þar komi m.a. fram:
- Þetta mark er hannað eingöngu til knattspyrnu iðkunar.
- Allar festingar skal yfirfara fyrir notkun.
- Mörk skulu á öllum tímum vera fest þannig að þau falli ekki fram yfir sig.
- Klifrið ekki á netum eða markramma.
Að auki skulu vera merkingar þar sem fram komi:
- Tilvitnun í ÍST EN 748
- Nafn framleiðanda og framleiðsluár.
- Fyrir hvaða notkun markið er hannað ásamt tegund nets.
Að auki gerir breski staðallinn ráð fyrir því að á frítt standandi mörkum séu upplýsingar um þá þyngd sem til þurfi til að tryggja stöðugleika marksins.
Núverandi rekstraraðili bíður átekta. Honum er kappsmál að mörkin séu meðfærileg, en samtímis þarf hann að tryggja að mörkin uppfylli framangreinda staðla. Mannvirkjanefnd KSÍ leggur til að framangreindri prófaðferð verði beitt á mörk Egilshallar til að ganga úr skugga um raunþyngd þeirra. Að því loknu er hægt að ákveða næstu skref.
Mannvirkjanefnd KSÍ. 31. mars 2006
