Mótamál

Leikið til úrslita í Borgunarbikar karla í dag!

FH og ÍBV mætast

9.8.2017

Úrslitaleikur Borgunarbikars karla fer fram í dag, 12. ágúst. Þar mætast FH og ÍBV á Laugardalsvelli, en leikurinn hefst klukkan 16:00.

Þetta er í níunda sinn sem liðin eigast við í bikarkeppninni, en FH hefur hingað til haft yfirhöndina í þessum viðureignum. FH hefur unnið fimm, en ÍBV þrjár. Árið 1983 þurftu liðin að mætast tvívegis, en fyrri leikur þeirra hafði þá endað með 2-2 jafntefli og því var leikinn annar leikur. 

Smelltu hérna til að skoða leikskrá.

Þess má þó geta að ÍBV sló FH út úr keppninni í fyrra á leið sinni í úrslitaleikinn.

ÍBV hefur 11 sinnum komist í úrslitaleikinn og unnið hann fjórum sinnum.

FH hefur komist fimm sinnum í úrslitaleikinn og unnið tvisvar.

Liðin hafa mæst einu sinni í úrslitaleik bikarsins, en það var árið 1972. Þá hafði ÍBV betur, 2-0, og var leikurinn spilaður á gamla Melavellinum í leiðinda haustveðri. Mörkin í leiknum skoraði Haraldur Júlíusson, oft kallaður Haraldur Gullskalli.

FH komst síðast í úrslit árið 2010 og sigraði þar KR 4-0. 

ÍBV komst síðast alla leið í fyrra en töpuðu 2-0 fyrir Val. 

Dómarar

Líkt og í undanúrslitunum verða sex dómarar á leiknum.

Dómari - Vilhjálmur Alvar Þórarinsson

Aðstoðardómarar - Jóhann Gunnar Guðmundsson og Oddur Helgi Guðmundsson

Fjórði dómari - Frosti Viðar Gunnarsson

Endalínudómarar - Þorvaldur Árnason og Gunnar Jarl Jónsson

Á leið sinni í úrslitin hefur ÍBV slegið út þessi lið: 

32 liða úrslit - 4-1 sigur á KH. 

16 liða úrslit - 5-0 sigur á Fjölni. 

8 liða úrslit - 2-1 sigur á Víking Reykjavík. 

Undanúrslit - 2-1 sigur á Stjörnunni. 

Á leið sinni í úrslitin hefur FH slegið út þessi lið: 

32 liða úrslit - 6-1 sigur á Sindra. 

16 liða úrslit - 2-1 sigur á Selfossi. 

8 liða úrslit - 1-0 sigur á Fylki. 

Undanúrslit - 1-0 sigur á Leikni Reykjavík. 

Miðasala er hafin á midi.is 

Miðaverð:

Fullorðnir - 2000 krónur.

11-16 ára - 500 krónur.

10 ára og yngri - frítt.

Fólk er hvatt til að kaupa miða á netinu til að forðast biðraðir í miðasölu á leikdag.

Stuðningsmenn

Stuðningsmenn ÍBV hittast á Kaffi Flóru í grasagarðinum í Laugardal klukkan 13:00 - 15:30. Þar mun Ingó veðurguð halda uppi stemningu ásamt öðru.

FH verður með fjölskylduhátíð í Kaplakrika frá klukkan 12:00. Rútur verða í Laugardalinn rétt fyrir 15:00. Á svæðinu verða hoppukastalar og ýmislegt fleira.

Allir á völlinn!




Mótamál




Aðildarfélög




Aðildarfélög


Skráning úrslita

Leiðbeiningar Úrslit leikja í öllum flokkum má skrá með SMS-skeyti eða í gegnum aðgang viðkomandi félags að ksi.is í gegnum Séraðgerðir hér að ofan