Valur og KR í úrslit í A-deild kvenna

Valur og KR tryggðu sér um helgina sæti í úrslitaleik A-deildar kvenna í Deildarbikarkeppni KSÍ með því að leggja andstæðinga sína í undanúrslitum. KR hafði betur gegn Breiðabliki í æsispennandi leik í Fífunni á laugardag. Staðan var jöfn eftir venjulegan leiktíma og framlengingu, 2-2, en KR nýtti spyrnur sínar betur í vítaspyrnukeppninni sem á eftir fylgdi. Íslandsmeistarar Vals lögðu síðan ÍBV örugglega á Stjörnuvelli á sunnudag, 8-1. Úrslitaleikur Vals og KR fer fram föstudaginn 6. maí á Stjörnuvelli.