VISA-bikarinn - Dómarar úrslitaleiksins

Dómari í úrslitaleik VISA-bikarsins að þessu sinni verður Garðar Örn Hinriksson og er þetta fyrsti bikarúrslitaleikur hans. Garðar hefur dæmt í efstu deild karla frá 1998.

Aðstoðardómarar verða Einar Guðmundsson og Gunnar Gylfason. Einar hefur þrisvar áður verið aðstoðardómari á úrslitaleik bikarkeppninnar, en Gunnar tekur nú þátt í fyrsta sinn. Þeim til aðstoðar sem varadómari leiksins verður Gylfi Þór Orrason, sem tvisvar hefur dæmt úrslitaleiki bikarsins, árin 1996 og 2001.

Eftirlitsmaður verður að þessu sinni Þóroddur Hjaltalín frá Akureyri. Þóroddur er í hópi eftirlitsmanna KSÍ á Norðurlandi og er fyrrum dómari í efstu deild, en hefur einnig starfað verulega í félagi sínu Þór á Akureyri, m.a. sem formaður knattspyrnudeildar þess um skeið.