Mótamál
Eyjólfur Ólafsson hættir
Hinn kunni knattspyrnudómari Eyjólfur Ólafsson dæmir leik Grindavíkur og KA í Landsbankadeild karla nú á laugardag, sem er 163. leikur hans í efstu deild. Það verður jafnframt síðasti leikur Eyjólfs sem deildardómari á vegum KSÍ, en starfi þeirra lýkur ekki síðar en í lok þess árs sem þeir verða fimmtugir. Þeim virðulega aldri náði Eyjólfur fyrr í sumar og var þá sæmdur gullmerki KSÍ. Eyjólfur hefur verið starfandi dómari frá árinu 1980, í efstu deild frá 1985 og milliríkjadómari á árunum 1989-1998. Fyrsti leikur Eyjólfs í efstu deild var viðureign Þórs og ÍA, sem fram fór á malarvelli Þórs á Akureyri 14. maí 1985.
