Góð aðsókn að leikjum í Landsbankadeild karla

Góð aðsókn hefur að verið að leikjum í Landsbankadeild karla í sumar og nú þegar einni umferð er ólokið er meðaltal áhorfenda 1.038, sem er næst hæsta meðaltal í efstu deild frá upphafi. Miðað við meðalaðsókn hjá þeim félögum sem eiga heimaleik í síðustu umferð ætti þetta meðaltal að haldast eða jafnvel hækka eilítið. Flestir áhorfendur eru að venju á KR-velli og næstflestir á Fylkisvelli, en Þróttur og ÍA eru einnig með yfir þúsund áhorfendur að meðaltali.