Að mörgu að hyggja varðandi leiki í mótum yngri flokka
Skráning á úrslitum og leikskýrslum - Lykilatriði
Á Íslandsmótum yngri flokka karla og kvenna er að mörgu að hyggja. Af því tilefni er rétt að rifja upp ýmis atriði sem þarf að hafa í huga, s.s. skráningu úrslita með sms-skeyti eða í gegnum ksi.is, sem og skráningu á leikskýrslum.
Bent er á að félögum ber skylda til að skrá úrslit og leikskýrslur í gagnagrunn KSÍ samkvæmt reglugerð um knattspyrnumót.
Tölvuskráning úrslita
Félögum ber að skrá úrslit heimaleikja og leikskýrslur í gagnagrunn KSÍ í gegnum ksi.is.
Öll félög hafa fengið úthlutað notendanafni og lykilorði. Aðildarfélögum er heimilt að úthluta áhugasömum einstaklingum innan félagsins þessu lykilorði til þess að úrslit leikja berist hratt og örugglega á vef KSÍ.
Í reglugerð um knattspyrnumót segir:
Vanræksla á skráningu úrslita í gagnagrunn KSÍ varðar sektum, kr. 100 kr. á leik. Vanræksla á skráningu upplýsinga á leikskýrslu í gagnagrunn KSÍ varðar dagsektum, kr. 55 á dag. Vanræksla á skilum á leikskýrslum varðar dagsektum, kr. 55 á dag.
Leikskýrslur
Mismunandi leikskýrslur eru notaðar í yngri flokkum eftir því hvort um er að ræða leiki í 11 manna bolta eða í 7 manna bolta.
Þegar leikið er í 11 manna bolta þarf að fylla út leikskýrslu fyrir hvern leik og senda að leik loknum til KSÍ. Þessar leikskýrslur fást á skrifstofu KSÍ.
Leikskýrslur í 7 manna fótbolta eru frábrugðnar skýrslum í 11 manna fótbolta. Um er að ræða einfaldara form þar sem notast er við ljósrit.
Í fyrsta lagi er um að ræða tilkynningu um úrslit leikja sem faxa skal til KSÍ eftir hvern leik.
Í öðru lagi er safnskýrsla með nöfnum leikmanna sem send er til KSÍ eftir að riðlakeppni lýkur. Þessi tvö eyðublöð er að finna á vef KSÍ.
Breytingar á leikjum
Stundum verður ekki hjá því komist að breyta þurfi leikjum. Í því tilfelli er mjög mikilvægt að slíkar breytingar séu tilkynntar til KSÍ á þar til gerðu eyðublaði og fylgt sé þeim reglum sem þar koma fram.
Ef mótanefnd KSÍ samþykkir beiðnina er leiknum breytt á vef KSÍ.
Félagaskipti
Almennt gildir það að þegar leikmaður skiptir um félag þurfa félagaskiptin að eiga sér stað með formlegum hætti á þar til gerðu eyðublaði.
Eftirfarandi bráðabirgðaákvæði gildir þó í yngstu aldursflokkunum:
Leikmenn 4. aldursflokks og yngri, teljast hlutgengir með því félagi sem þeir leika með í fyrsta skipti í Íslandsmóti á almanaksárinu. Kjósi leikmaður að skipta um félag eftir það, þurfa að eiga sér stað formleg félagaskipti.
Hlutgengi leikmanna milli liða 1 og 2
Í því tilfelli þegar félag er með tvö A lið í móti gildir að leikmaður sem leikið hefur með liði 1 er ekki heimilt að leika með liði 2 fyrr en eftir næsta leik hjá liði 2 þar á eftir (leikmaðurinn verður að bíða einn leik með liði 2).
Agareglur
Mismunandi agareglur gilda eftir því hvort um sé að ræða keppni í 7 eða 11 manna fótbolta.
Áminningar og brottvísanir eru ekki skráðar á leikskýrslu í keppnum í 7 manna liðum og brottvísun gildir aðeins í viðkomandi leik og hefur ekki í för með sér frekara keppnisbann nema að um sé að ræða mjög alvarlegt atvik sem dómari skal þá gefa aganefnd skýrslu um.
Í 11 manna fótbolta skal leikmaður sem vísað er af leikvelli fara sjálfkrafa í leikbann í næsta leik, aganefnd fjallar um allar brottvísanir í keppni 11 manna liða sbr. starfsreglur aganefndar KSÍ.
