Margir spennandi leikir í 16-liða úrslitum VISA-bikars karla
Aðeins einn Landsbankadeildarslagur
Útlit er fyrir marga spennandi leiki í 16-liða úrslitum VISA-bikars karla, en dregið var á Hótel Loftleiðum í hádeginu í dag, þriðjudag. Aðeins er um einn slag Landsbankadeildarliða að ræða - Grindavík tekur á móti Fylki.
Þróttur er eina liðið úr Landsbankadeild sem ekki leikur í 16-liða úrslitum. Haukar, sem leika í 1. deild, höfðu betur gegn Þrótturum í vítaspyrnukeppni í 32-liða úrslitum og mæta Val í 16-liða úrslitum, en söguleg tengsl þessara félaga eru flestu knattspyrnuáhugafólki að góðu kunn.
Fyrir dráttinn þóttu góðir möguleikar á því að nokkuð margir nágrannaslagir yrðu í 16-liða úrslitum, en sú varð þó ekki raunin. Eini nágrannaslagurinn í 16-liða úrslitum verður viðureign Víkings og KR í Víkinni.
Leikirnir í 16-liða úrslitum VISA-bikars karla
Víkingur R. - KR
FH - KA
Þór - Fram
Grindavík - Fylkir
ÍBV - Njarðvík
Valur - Haukar
HK - Keflavík
ÍA - Breiðablik
Leikdagar og leiktímar verða birtir síðar í dag.
Fylgist með á mótasíðu VISA-bikars karla.
