Þýsk markaveisla í síðari hálfleik
Potsdam nýtti færin vel og skoraði átta mörk gegn Val
Valur tapaði með sjö marka mun gegn þýska liðinu Potsdam í 8-liða úrslitum Evrópukeppni félagsliða kvenna á Laugardalsvellinum í dag, sunnudag. Liðin mætast að nýju í Þýskalandi eftir viku.
Fyrri hálfleikur gaf engan veginn til kynna hvað myndi gerast í síðari hálfleik, því Valsstúlkur áttu í fullu tré við lið Potsdam í fyrri hálfleik. Gestirnir náðu forystunni með slysalegu sjálfsmarki varnarmanns Vals, en Guðný Óðinsdóttir jafnaði metin með góðu marki. Á lokamínútu fyrri hálfleiks náðu Þjóðverjarnir aftur forystunni og segja má að það hafi verið upphafið að endinum hjá Val.
Síðari hálfleikur var hrein og klár markaveisla af hálfu þýska liðsins og áður en yfir lauk höfðu þær bætt við sex mörkum, skoruðu nánast úr hverju einasta færi sem þær fengu. Lokatölur leiksins urðu því 8-1, Potsdam í vil, sem er í raun ótrúlegur munur miðað við spilamennskuna í fyrri hálfleik.
