Síðari leikur Vals og Potsdam á sunnudag
Valsstúlkur fá tækifæri til að sýna hvað í þeim býr
Síðari leikur Vals gegn þýska liðinu Potsdam í 8-liða úrslitum Evrópukeppni félagsliða kvenna fer fram í Þýskalandi á sunnudag. Eins og kunnugt er vann þýska liðið fyrri leikinn 8-1 á Laugardalsvellinum.
Valsstúlkur fá þarna kærkomið tækifæri til að sýna hvað í þeim býr, því tapið í fyrri leiknum var einfaldlega alltof stórt miðað við getu Valsliðsins.
Viðureign liðanna fer fram á Karl-Liebknecht leikvanginum í Potsdam og hefst kl. 13:00 að íslenskum tíma.
Dómakvartett leiksins kemur frá þremur löndum - Rúmeníu, Póllandi og Þýskalandi. Floarea Cristina Ionescu frá Rúmeníu verður með flautuna og Irina Mirt, sem einnig er rúmensk, verður aðstoðardómari. Hinn aðstoðardómarinn kemur frá Póllandi og heitir Katarzyna Nadolska. Inka Müller frá Þýskalandi mun sinna starfi fjórða dómara.
