Landsbankadeildarbolti
Leikið með sérstakan knött í Landsbankadeildum 2006
Ákveðið hefur verið að leikið verði með sérmerktan knött í öllum leikjum Landsbankadeilda karla og kvenna 2006 - Landsbankadeildarknött. Samið hefur verið við Hoffell ehf. um Mitre Pro 100T knöttinn. Þessi ákvörðun er tekin í samstarfi KSÍ, Samtaka félaga í efstu deild (SED) og Landsbankans.
Mitre Pro 100T knötturinn er FIFA Approved knöttur og opinber knöttur enska knattspyrnusambandsins. Leikið er með þann knött í þremur af fjórum deildum ensku deildarkeppninnar (Championship, 1st division og 2nd division) og í ensku bikarkeppninni (FA cup), auk þess sem enska landsliðið leikur með sams konar knött. Einnig er leikið með sams konar knött í skosku úrvalsdeildinni (SPL), írsku úrvalsdeildinni og víðar.
Á hverjum knetti verða prentuð merki Landsbankadeildarinnar og KSÍ. Um er að ræða framleiðslu á knöttum með merkjunum tveimur á, þannig að gæði og ending prentunar eru tryggð.Sérstakur Landsbankadeildarknöttur mun enn frekar styrkja ímynd Landsbankadeildanna og vörumerkið Landsbankadeild í knattspyrnu og er í takt við það sem gert er í atvinnu- og hálfatvinnumannadeildum víðs vegar um Evrópu.
Sóknartækifærin eru mörg, þar sem slíkur knöttur mun nýtast vel í enn betra markaðs- og kynningarstarfi deildanna, hvort sem um er að ræða hjá Landsbankanum, KSÍ eða félögunum sjálfum.
Mynd:
Mitre Pro 100T knöttur, sambærilegur þeim sem leikið verður með í Landsbankadeildum karla og kvenna 2006.
