Evrópuævintýrið búið í ár

Bæði Fylkir og Grindavík eru úr leik í UEFA-bikarnum eftir síðari leikina í forkeppninni, sem fram fóru í kvöld. Fylkismenn gerðu markalaust jafntefli við sænska liðið AIK í bragðdaufum leik á Laugardalsvellinum, en Svíarnir unnu fyrri leikinn 1-0. Í Grindavík komust heimamenn yfir gegn Kärnten frá Austurríki með marki Rays Anthonys Jónssonar þegar 15 mínútur voru til leiksloka og hefðu komist áfram á marki skoruðu á útivelli ef það hefðu verið lokatölur leiksins, en fyrri leiknum lauk með 2-1 sigri Kärnten. Austurríkismennirnir jöfnuðu hins vegar metin þegar komið var fram yfir venjulegan leiktíma og tryggðu sér þannig áframhaldandi veru í keppninni.

Ekkert íslenskt lið náði að komast í gegnum fyrstu hindrun í Evrópukeppnum í ár. KR í forkeppni Meistaradeildar UEFA, Fylkir og Grindavík í UEFA-bikarnum og KA í Intertoto-keppninni.