Ný riðlaskipting í 3. deild karla 2006

Snörtur ekki með, Snæfell bætist við

13.3.2006

Ákveðin hefur verið ný riðlaskipting í 3. deild karla.  Snörtur hefur hætt við þátttöku og Snæfell hefur verið samþykkt til keppni, auk þess sem fram komu óskir félaga á Austurlandi um að áður útgefin riðlaskipting yrði endurskoðuð.

Snörtur á Kópaskeri hættir við þátttöku

Snörtur á Kópaskeri hefur hætt við þátttöku í 3. deild karla sumarið 2006. Liðið sem leikur heimaleiki sína á Dúddavelli á Kópaskeri hefur tekið þátt í keppni 3. deildar undanfarin 3 ár, 2003 til 2005. Snörtur heldur hins vegar áfram þátttöku í Deildarbikar KSÍ og í VISA-bikar karla 2006.

Snæfell í Stykkishólmi samþykkt til keppni

Snæfell í Stykkishólmi hefur óskað eftir þátttöku í keppni 3. deildar karla sumarið 2006 og hefur KSÍ fallist á þátttöku félagsins.  Snæfell hefur ekki tekið þátt í meistaraflokki um nokkurt skeið - var síðast með lið í keppni í 3. deild sumarið 1998.

Óskir félaga um endurskoðun

Auk ofangreindra breytinga komu fram óskir félaga á Austurlandi um að áður útgefin riðlaskipting fyrir Austur – og Norðurland yrði endurskoðuð.

Fyrirkomulag 3. deildar 2006

Mótanefnd KSÍ telur skynsamlegt að stjórn KSÍ breyti fyrri ákvörðun um skiptingu í riðla og leggur til að riðlaskipting verði með þessum hætti 2006:

Riðill A

Suðvesturland, þar með Vestmannaeyjar

• 8 lið  - 14 leikir/lið (tvöföld umferð)

Riðill B

Suðvesturland, þar með Vestfirðir

• 8 lið  - 14 leikir/lið (tvöföld umferð)

Riðill C

Vesturland og Norðurland vestra

• 6 lið  - 15 leikir/lið (þreföld umferð)

Riðill D

Norðurland eystra og Austurland

• 8 lið  - 14 leikir/lið (tvöföld umferð)

Ný riðlaskipting 2006

Unnið verður að niðurröðun leikja í 3. deild í samræmi við þessa skipan mála, en stjórn KSÍ mun afgreiða tillöguna á fundi sínum 27. mars næstkomandi.