Mikil spenna í báðum riðlum A-deildar karla
KR-ingar sóttu 6 stig til Akureyrar
Mikil spenna er í báðum riðlum A-deildar í Deildarbikarkeppni karla og útlit fyrir að ekki ráðist fyrr en í lokaumferðinni hvaða lið komast í undanúrslit.
KR-ingar sóttu sín fyrstu stig í keppninni til Akureyrar þegar þeir lögðu bæði Akureyrarliðin á sannfærandi hátt um liðna helgi. Meðal annarra úrslita helgarinnar má nefna að Eyjamenn lögðu FH-inga á Leiknisvelli, Fylkir vann Þrótt í miklum markaleik, Breiðablik og Grindavík gerðu jafntefli á Stjörnuvelli og Valsmenn unnu góðan sigur á ÍA í Egilshöll.
Í 1. riðli standa Íslandsmeistarar FH-ingar og Fylkismenn best að vígi, en liðin þar á eftir koma í einum hnapp.
Skagamenn eru efstir í 2. riðli en hafa lokið 6 leikjum á meðan bæði Víkingur og Keflavík, sem eru í næstu sætum, eiga tvo leiki til góða.
Í A-deild kvenna eru Íslands- og bikarmeistarar Breiðabliks í efsta sæti með fullt hús stiga eftir þrjá leiki, þar á meðal 11-0 sigur á FH um helgina, en þar á eftir koma Valur og Stjarnan.
Leiknir R., Stjarnan, Dalvík/Reynir og Höttur byrja vel í B-deild karla.
Í Deildarbikarnum fara leikir fram á gervigrasvöllum og í knattspyrnuhúsum.
