Mótamál
Konurnar láta að sér kveða
Þrjár konur aðstoðardómarar í fyrstu umferð VISA-bikarsins
Í gegnum tíðina hefur kvenfólk látið meira að sér kveða í dómgæslu. Betur má ef duga skal en athygli vakti þó að 3 konur voru aðstoðardómarar í fyrstu umferð VISA-bikars karla.
Í leik Aftureldingar og UMFL var Íris Björk Eysteinsdóttir aðstoðardómari. Það sama má segja um Marínu Ósk Þórólfsdóttur sem var aðstoðardómari á leik Reynis Sandgerði og Tunglsins. Þá er ógetið að á leik KE og BN á Fellavelli var það Silja Þórunn Arnfinnsdóttir sem var aðstoðardómari.
Það er vonandi að þessi þróun haldi áfram og fleiri konur spreyti sig á dómgæslunni. Sífellt fleiri skrá sig á unglingadómaranámskeið í hvert skipti og á yfirstandandi námskeiði eru 17 konur skráðar til leiks.
