Valsstúlkur bikarmeistarar

Valur sigraði ÍBV 3-1 í úrslitaleik VISA-bikars kvenna í dag, sunnudag. Leikurinn var fjörugur og skemmtu rúmlega 1.000 áhorfendur sér vel í blíðunni í Laugardalnum. Öll mörk leiksins komu í fyrri hálfleik, Karen Burke kom ÍBV yfir á 5. mínútu, en Nína Ósk Kristinsdóttir jafnaði fimm mínútum síðar. Nína var síðan aftur á ferðinni á 40. mínútu þegar hún gerði laglegt mark, og Kristín Ýr Bjarnadóttir gerði síðasta mark leiksins á 44. mínútu. Valsstúlkur hafa oftast allra liða sigrað í bikarkeppninni, hafa nú hampað bikarnum 9 sinnum.