Íslenskir dómarar í útrás
Jóhannes dæmir í Finnlandi og Erlendur í Svíþjóð
Íslenskir dómarar verða í eldlínunni um helgina og bregða undir sig betri fætinum. Jóhannes Valgeirsson dæmir leik Tampere og Kalmar FF í 2. umferð Inter-Toto keppninnar. Erlendur Eiríksson dæmir svo leik Trelleborg og IF Brommapojkarna.
Jóhannesi til aðstoðar í Finnlandi verða þeir Eyjólfur Finnsson og Einar Sigurðsson en leikur þeirra fer fram á sunnudaginn kl. 15:30.
Erlendur heldur hinsvegar einn í víking en ferð hans er hluti af norrænu samstarfi varðandi dómaramál. Leikur Trelleborg og Brommapojkarna er í sænsku 1. deildinni en með Trelleborg leikur einmitt Reynir Leósson, fyrrum leikmaður Skagamanna. Sá leikur er einnig leikinn á sunnudaginn og hefst kl. 15:00.
Myndir: Jóhannes Valgeirsson(efri mynd) og Erlendur Eiríksson verða á faraldsfæti um helgina.
