VISA-bikar kvenna og karla í algleymingi
Tvö lið úr Landsbankadeildinni duttu úr VISA-bikar kvenna í gærkvöldi
Í gær hófst önnur umferð VISA-bikar kvenna með þremur leikjum. Henni lýkur svo í kvöld með tveimur leikjum. Þá hefjast 16. liða úrslit VISA-bikars karla á sunnudaginn með fimm leikjum.
Önnur umferð VISA-bikars kvenna hófst með látum og þegar kvöldið hafði runnið sitt skeið á enda, lágu tvö Landsbankadeildarlið í valnum. Í Fagralundi var það 1. deildar lið HK/Víkings sem að lagði Fylki að velli, 2-1. Þurfti framlengingu til að knýja fram þau úrslit. Hana þurfti ekki þegar að FH lá á heimavelli sínum gegn 1. deildar liði ÍR. Unnu gestirnir þann leik með fimm mörkum gegn einu. Í þriðja leiknum í gærkvöldi voru það Stjörnustúlkur er lögðu Þróttara með sex mörkum gegn engu á útivelli.
Þessari 2. umferð í VISA-bikar kvenna, lýkur svo í kvöld þegar að Þór/KA tekur á móti Keflavík og Haukar á móti Fjölni.
Sunnudaginn 2. júlí hefjast svo 16. liða úrslit í VISA-bikar karla. Daginn eftir, 3. júlí, fara svo fram tveir leikir og síðasti leikur 16. liða úrslitanna er svo leikinn fimmtudaginn 6. júlí. Er það leikur Leiknis og Keflavíkur en sá leikur er leikinn seinna vegna þátttöku Keflvíkinga í Inter-Toto keppninni.
Knattspyrnuáhugamenn eru hvattir til að mæta á leiki í VISA-bikarnum og hvetja sitt lið sem aldrei fyrr.
