"Landsleikur" á Fylkisvelli á föstudag
Lið skipuð poppurum, leikurum, stjórnmálamönnum, sjónvarpsmönnum og fleiri kempum
Um þessar mundir eru liðin 15 ár síðan Litháen hlaut sjálfstæði að nýju, en eins og kunnugt er var Ísland meðal fyrstu landa til að viðurkenna sjálfstæði landsins. Í tilefni af því fara fram mikil hátíðahöld bæði hér á landi í tengslum við menningarnótt Reykjavíkurborgar.
Meðal viðburða má nefna tónleika, sýningar og önnur skemmtiatriði, en það sem gæti vakið mestan áhuga knattspyrnuáhugafólks er "landsleikur" milli Íslands og Litháens á gervigrasvelli Fylkis í Árbæ á föstudag kl. 19:00. Liðin eru m.a. skipuð poppurum, stjórnmálamönnum, leikurum, fjölmiðlamönnum og fleiri kempum.
Fulltrúar Litháens eru liðsmenn LT United, sem er einmitt sama nafn og á kunnri hljómsveit sem söng svo eftirminnilega fyrir hönd landsins í Eurovision í ár - "We are the winners ...". Liðsmenn sveitarinnar þykja liðtækir knattspyrnumenn og eru í knattspyrnuliði LT United ásamt fyrrverandi landsliðsmönnum Litháens í knattspyrnu og körfuknattleik, þekktum leikurum og fjölmiðlamönnum þar í landi.
Fulltrúar Íslands eru liðsmenn Rögnunnar (Ungmannafélagið Ragnan), sem getið hafa sér gott orð í utandeildarkeppninni síðasta áratuginn. Í liði Rögnunnar eru margir þjóðþekktir menn - þ.á.m. sjónvarpsmaðurinn Logi Bergmann Eiðsson, borgarfulltrúinn Gísli Marteinn Baldursson, Alþingismaðurinn Sigurður Kári Kristjánsson og leikarinn Rúnar Freyr Gíslason, sem lék Romario svo eftirminnilega í atriði Silvíu Nætur í Eurovision.
Leikurinn er sem fyrr segir liður í hátíðahöldum vegna 15 ára sjálfstæðisafmælis Litháen og má búast við mikilli skemmtun, enda leika bæði lið knattspyrnu til að skemmta sjálfum sér og öðrum aðdáendum hinnar vinsælu íþróttar. Er fólk því hvatt til að mæta og njóta góðrar stundar yfir góðum knattspyrnuleik af léttara taginu.
Ísland - Litháen
Umf. Ragnan - LT United
Gervigrasvöllur Fylkis
Föstudagur 18. ágúst kl. 19:00
Allir á völlinn!
