Lokaumferð 2. deildar karla á laugardag
Úrslit geta einnig ráðist í 1. deildinni
Á laugardag ráðast endanleg úrslit í 2. deild karla en þar er spenna bæði á toppi og botni deildarinnar. Fjarðabyggð og Njarðvík berjast um toppsætið en Huginn og Sindri um fallsætið. Í 1. deildinni getur HK tryggt sér sæti í Landsbankadeild karla á næsta tímabili.
Þrjú lið hafa þegar tryggt sér sæti í 1. deild að ári, Fjarðabyggð, Njarðvík og Reynir Sandgerði. Baráttan stendur hinsvegar um hvaða lið vinnur 2. deildar titilinn. Fjarðabyggð er í efsta sæti með 41 stig og mætir Reyni á útivelli í sínum síðasta leik. Njarðvík, sem er einu stigi á eftir Fjarðabyggð með 40 stig, mæta Huginsmönnum á Seyðisfirði.
Á botninum er ekki síður spenna og þar er hörð barátta á milli Hugins og Sindra um fallið en aðeins eitt lið fellur í 3. deild. Huginn mætir Njarðvík og Sindri fær Aftureldingu í heimsókn á Hornafjörð.
Í fyrstu deildinni getur HK tryggt sér sæti í Landsbankadeildinni og þar með sæti í efstu deild í fyrsta sinn í sögu félagsins. Mæta þeir Víking Ólafsvík á heimavelli og með sigri er Landsbankadeildarsæti í höfn. Fjölnir er eina liðið sem getur komist upp fyrir HK en þeir mæta Leikni á heimavelli. Fram hefur nú þegar tryggt sér sæti í Landsbankadeildinni og getur tryggt sér 1. deildar titilinn á morgun.
Baráttan á botninum er geysihörð en einungis fellur eitt lið úr 1. deild vegna fjölgunar. Fimm lið eru enn í hættu þegar 2 leikir eru eftir. Þór er neðst sem stendur en margir möguleikar eru í stöðunni.
Um kl. 16:00 á morgun verða línur klárar í 2. deild og hugsanlega eitthvað skýrari í 1. deildinni. Allir leikir beggja deilda hefjast kl. 14:00 og eru áhorfendur hvattir til að mæta á völlinn.
