Nú rjúfum við múrinn!
Góður möguleiki á því að fara yfir 100.000 áhorfendur í Landsbankadeild karla
Síðasta umferð Landsbankadeildar karla fer fram á laugardaginn og er mikil spenna í öllum leikjunum. Hreinn úrslitaleikur er um annað sætið á milli Reykjavíkurliðanna Vals og KR. Þá eru fimm lið sem eiga á hættu að falla niður í 1. deild ásamt ÍBV. Með góðri mætingu er möguleiki á því að áhorfendur verði yfir 100.000 í fyrsta skiptið og að nýtt áhorfendamet verði sett.
Áhorfendametið er frá 2001 en þá mættu 96.840 manns á völlinn eða 1076 að meðaltali á leik.
Þegar að 17 umferðum er lokið hafa 92.768 áhorfendur mætt á leiki í Landsbankadeild karla. Þetta þýðir að 1.091 hafa verið að meðaltali á leikjum í sumar. Nýkrýndir Íslandsmeistarar FH hafa haft flesta áhorfendur á bak við sig í heimaleikjum í sumar en 1.948 mættu í Kaplakrikann að meðaltali.
Knattspyrnuáhugamenn eru hvattir til þessa að mæta til leiks í lokaumferðinni og hvetja sitt lið duglega því mikið liggur undir hjá mörgum félögum.
Tafla yfir áhorfendafjölda eftir 17 umferðir 2006
