Baráttan um Evrópusætin
KR, Valur og Keflavík berjast um sætin
Einn af mörgum spennandi leikjum í lokaumferð Landsbankadeildarinnar á laugardaginn er einvígi Reykjavíkurliðanna Vals og KR. Leika þau á Laugardalsvelli úrslitaleik um annað sætið og dugar KR jafntefli í þeim leik.
Á Laugardalsvellinum ræðst baráttan um annað sætið í Landsbankadeildinni og um leið þátttökuréttur í Evrópukeppni félagsliða að ári. Eigast þar við Valur og KR og má búast við miklu fjöri þar á bæ en leikurinn hefst, eins og aðrir leiki í umferðinni, kl. 14:00. KR situr sem stendur í öðru sæti með 29 stig en Valsmenn eru með 28 stig. Það er því ljóst að Valsmönnum dugar ekkert minna en sigur á heimvelli til að hreppa annað sætið.
Íslandsmeistarar FH munu taka þátt í Meistaradeild Evrópu á næsta tímabili en fróðlegt er að skoða möguleikana á hinum Evrópusætunum. Um er að ræða þrjú sæti til viðbótar, tvö í Evrópukeppni félagsliða (UEFA keppnin) og eitt í Inter-Toto keppninni.
Ljóst er að liðin er fara í þessar keppnir eru: KR, Valur og Keflavík. Hvernig þau raðast í keppnirnar fer aftur á móti eftir því hvaða lið lendir í öðru sæti Landsbankadeildar og hvaða lið verður bikarmeistari. Bikarúrslitaleikur KR og Keflavíkur fer fram laugardaginn 30. september. Möguleikarnir varðandi Evrópusætin eru eftirfarandi:
KR í öðru sæti Landsbankadeildar – KR VISA-Bikarmeistari:
KR og Valur í UEFA keppnina – Keflavík Inter-Toto keppnina
KR í öðru sæti Landsbankadeildar – Keflavík VISA-Bikarmeistari:
KR og Keflavík í UEFA keppnina – Valur í Inter-Toto keppnina
Valur í öðru sæti Landsbankadeildar – KR VISA-Bikarmeistari:
Valur og KR í UEFA keppnina – Keflavík í Inter-Toto keppnina
Valur í öðru sæti Landsbankadeildar – Keflavík VISA-Bikarmeistari:
Valur og Keflavík í UEFA keppnina – KR í Inter-Toto keppnina
