Kynningarmót í Futsal að hefjast
Sjö félög taka þátt í þessu fyrsta Futsalmóti
Um helgina hefst kynningarmót í Futsal og eru sjö félög sem taka þátt í þessu fyrsta Futsalmóti á Íslandi. Fyrsti leikurinn fer fram í Framhúsinu, laugardaginn kl. 12:15 og mætast þá Fram og Fylkir.
Önnur félög er taka þátt í þessu kynningarmóti eru: KR, Valur, Víkingur R, Njarðvík og Grótta. Leikin er einföld umferð og er leikið í þeim húsum er félögin hafa til umráða.
Leiktíminn í Futsal er 2x20 mínútur og er leiktíminn stöðvaður í hvert skipti sem boltinn fer úr leik. Nokkur munur er á reglum Futsal og hins hefðbunda innanhússbolta sem nú er leikinn á Íslandi. Mótið er því ætlað til kynningar fyrir alla aðila en á næsta ári stendur til að alllur innanhússbolti verði leikinn eftir Futsal reglum.
Vinsældir Futsal hafa aukist á hverju ári og eru nú 8 atvinnumannadeildir í Futsal í heiminum. Haldin er Heimsmeistarakeppni og Evrópumót landsliða sem og er keppt í Evrópukeppni félgasliða. Núverandi heimsmeistarar í Futsal eru Spánverjar en þeir eru einnig Evrópumeistarar. Hinsvegar eru Ítalir efstir á styrkleikalista landsliða í Futsal en það er vefsíðan Futsal Planet er heldur honum úti.
Það er því aldrei að vita nema að framtíðarlandsliðsmenn í Futsal leiki listir sínar um helgina og eru áhugamenn hvattir til þess að kíkja á leikina á næstunni og kynna sér þessa skemmtlegu íþrótt.
