Síðari leikir ÍA og FH á fimmtudag

ÍA og FH leika síðari leiki sína í 2. umferð forkeppni UEFA-bikarsins á fimmtudag. ÍA mætir sænska liðinu Hammarby á Akranesvelli og hefst leikurinn kl. 17:00. Svíarnir, með íslenska landsliðsmanninn Pétur Marteinsson innanborðs, unnu fyrri leikinn með tveimur mörkum gegn engu. FH-ingar leika gegn Dunfermline á McDiarmid Park í Perth í Skotlandi og hefst sá leikur kl. 18:45 að íslenskum tíma. Fyrri leik liðanna lauk með 2-2 jafntefli á Laugardalsvelli.