Dregið í VISA-bikar karla og kvenna á fimmtudag
Síðustu leikir í 3. umferð karla og 2. umferð kvenna fara fram í kvöld
Á morgun, fimmtudaginn 14. júní verður dregið í VISA-bikarkeppni karla og kvenna í höfuðustöðvum KSÍ. Drátturinn hefst kl. 12:00 og verður dregið í 4. umferð hjá körlunum en í 8. liða úrslit hjá konunum.
Í kvöld fara fram síðustu leikir umferðanna, bæði hjá körlum og konum. Dalvík/Reynir mæta Völsungi á Dalvíkurvelli og á Fáskrúðsfirði eigast við Leiknir F. og Sindri. Báðir leikirnir hefjast kl. 20:00 og eru lokaleikir í 3. umferð VISA-bikars karla.
Hjá konunum eru einnig tveir leikir í kvöld. Þór/KA tekur á móti Hetti á Akureyrarvelli og í Grafarvoginum eigast við Fjölnir og FH. Báðir þessir leikir eru í 2. umferð VISA-bikars kvenna og hefjast kl. 20:00.
Hjá körlunum verða 12 félög í pottinum, tvö þeirra koma frá Norðurlandi og munu þau leika saman eins og liðið tvö af Austurlandi. Átta félög eru þá eftir af Suð-Vesturlandi og munu þau dragast saman. Sigurvegarar þessara sex leikja munu svo fara í 16. liða úrslit ásamt félögunum úr Landsbankadeildinni. Í 8-liða úrslitunum hjá konunum er hinsvegar engin svæðaskipting.
