Valsmenn mæta Cork frá Írlandi í Inter-Toto
Leikið laugardaginn 23. júní kl. 20:00 á Laugardalsvelli
Valsmenn taka á móti írska liðinu Cork City í fyrstu umferð Inter-Toto keppninnar. Leikurinn fer fram laugardagskvöldið 23. júní og hefst kl. 20:00 á Laugardalsvelli. Cork City er sem stendur í fimmta sæti í írsku deildinni.
Cork City endaði í fjórða sæti írsku deildarinnar á síðasta keppnistímabili og vann sér því inn þátttökurétt í Inter-Toto keppninni í ár. Þeir eru sérstaklega sterkir á heimavelli sínum og töpuðu ekki leik þar á síðasta tímabili og fengu einungis á sig 5 mörk í 15 leikjum á heimavelli. Það sem af er tímabilinu í ár hefur liðið leikið 13 leiki og eru enn taplausir á heimavelli.
Seinni leikur liðanna fer svo fram í Írlandi, laugardaginn 30. júní. Sigurvegari í þessari viðureign mætir svo sigurvegaranum úr einvígi Hammarby frá Svíþjóð og KÍ Klakksvík frá Færeyjum í annarr umferð.
Miðasala á leikinn er hafin á netinu og er hægt að nálgast miða á www.midi.is. Hægt er að fá miðann á forsöluafslætti og gildir hann til 22. júní.
Áhorfendur eru hvattir til þess að fjölmenna á völlinn og styðja Valsliðið áfram í Inter-Toto keppninni.
