Valur Íslandsmeistari í kvennaflokki
Margrét Lára Viðarsdóttir bætti eigið markamet
Valur varð Íslandsmeistari kvenna í kvöld þegar þær lögðu Þór/KA að velli í lokaumferðinni með tíu mörkum gegn engu. Valur hlaut því 46 stig og varð þremur stigum á undan silfurliði KR í Landsbankadeild kvenna. Þetta er í 7. skiptið er Valur verður Íslandsmeistari í kvennaflokki og í þriðja sinn á fjórum árum.
Markatala Vals er einkar glæsileg því að þær skoruðu 88 mörk en fengu einungis á sig 7 mörk í leikjunum 16.
Margrét Lára Viðarsdóttir varð markahæst í Landsbankadeildinni í fjórða skiptið í röð. Margrét Lára bætti sitt eigið markamet og skoraði 38 mörk í Landsbankadeildinni. Fyrra metið var síðan á síðasta tímabili er Margrét Lára skoraði 34 mörk.
Valsstúlkur töpuðu ekki leik á þessu Íslandsmóti og gerðu aðeins eitt jafntefli, við silfurlið KR í fyrri umferðinni. ÍR féll úr Landsbankadeildinni í ár en upp koma HK/Víkingur og Afturelding en 10 félög leika í Landsbankadeildinni á næsta tímabili.
Tímabilið er ekki búið hjá Valsstúlkum því þær eru komnar í milliriðla Evrópukeppni kvenna og leika í Belgíu dagana 11. til 16. október.
