Dregið í undanúrslit í VISA-bikarnum

Í hádeginu í dag, föstudag, var dregið í undanúrslit VISA-bikars karla og VISA-bikars kvenna. Í karlaflokki mætast FH og KA annars vegar, en HK og Keflavík hins vegar, og fara báðir leikir fram á Laugardalsvelli. Af þessum liðum eru Keflvíkingar þeir einu sem hafa hampað bikarmeistaratitli, 1997 og 1975. Í kvennaflokki mætast ÍBV og Stjarnan í Eyjum, og Valsstúlkur taka á móti KR að Hlíðarenda. Valur hefur oftast allra liða orðið bikarmeistari, 9 sinnum, KR hefur sigrað tvisvar, en ÍBV og Stjarnan hafa aldrei orðið bikarmeistarar.

Á myndinni hér til hliðar má sjá þá Atla Svein Þórarinsson fyrirliða KA og Heimi Guðjónsson fyrirliða FH, ásamt Sigrúnu Hörpu Guðnadóttur frá VISA.