Kristinn dæmir á Goodison Park
Leikur Everton og Zenit verður í beinni útsendingu á sjónvarpsstöðinni Sýn
Kristinn Jakobsson mun á morgun dæma leik Everton og Zenit St. Petersburg í UEFA bikarnum en leikið er á Goodison Park. Honum til aðstoðar verða þeir Sigurður Óli Þorleifsson og Gunnar Gylfason. Fjórði dómari verður Magnús Þórisson.
Þetta er þriðji leikurinn á þessu ári sem Kristinn dæmir í þessari keppni en í nóvember dæmdi hann leik Spartak Moskvu og Bayern Leverkusen og í september var hann við stjórnvölinn í leik Rennes og Lokomotiv Sofia.
Everton og Zenit verma tvö efstu sætin í A-riðli, Everton er með sex stig eftir tvo leiki en Zenit er með fimm stig eftir þrjá leiki. AZ Alkmaar fylgir þar fast á eftir með fjögur stig eftir tvo leiki.
Leikur Everton og Zenit verður í beinni útsendingu á sjónvarpsstöðinni Sýn og hefst útsending kl. 19:35
