Breiðablik og Valur Íslandsmeistarar innanhúss
Fyrsta Íslandsmótið þar sem leikið er eftir Futsal reglum í innanhússknattspyrnu
Breiðablik og Valur urðu í dag Íslandsmeistarar í innanhússknattspyrnu en úrslitaleikir karla og kvenna voru leiknir í Laugardalshöll. Breiðablik sigraði ÍR í kvennaflokki 9-3 og Valur lagði ÍBV í karlaflokki, 7-2.
Blikastúlkur komust tveimur mörkum yfir eftir aðeins fimm mínútur í leik þeirra gegn ÍR. Þær bættu svo þriðja markinu við í lok fyrri hálfleiks og leiddu með þremur mörkum í hálfleik. ÍR stúlkur komu af krafti í seinni hálfleik og skoruðu tvö mörk á fyrstu tveimur mínútunum. Leikurinn var hraður og skemmtilegur en Blikar bættu fjórða markinu við stuttu síðar. Þrátt fyrir ágætar tilraunir Breiðhyltinga náðu þær ekki að bæta við marki en Blikar gerðu fimm mörk á síðustu átta mínútunum og tryggðu sér Íslandsmeistaratitilinn. Harpa Þorsteinsdóttir skoraði þrjú mörk fyrir Breiðablik, Jóna Kristín Hauksdóttir tvö eins og Berglind Björg Þorvaldsdóttir. Þær Anna Birna Þorvarðardóttir og Bryndís Bjarnadóttir skoruðu svo sitt hvort markið. Fyrir ÍR skoraði Aleksandra Mladenovic tvö mörk Margrét Sveindóttir eitt.
Valsmenn byrjuðu leikinn gegn ÍBV af krafti og komust yfir strax á 2. mínútu. Í hröðum og bráðfjörugum leik höfðu Valsmenn yfirhöndina og komust í 3-0 og leiddu þannig í hálfleik. Skemmtileg tilþrif sáust hjá báðum liðum í leiknum og Vestmannaeyingar gáfu lítið eftir. Valsmenn bættu svo fjórða markinu við eftir fimm mínútna leik í seinni hálfleik og virtust ætla að fara með öruggan sigur af hólmi. Eyjamenn skorðu hinsvegar tvö mörk á tveggja mínútna kafla þegar fimm mínútur voru eftir af leiknum. Þá bættu Valsmenn í að nýju og skoruðu þrjú mörk á lokamínútunum og tryggðu sér Íslandsmeistaratitilinn. Valsmenn sigruðu einnig á sérstöku Kynningarmóti í Futsal sem fram fór á síðasta ári og kunna greinilega vel við sig með Futsal boltann.
Birkir Már Sævarsson og Sigurbjörn Hreiðarsson skoruðu tvö mörk fyrir Val í leiknum og þeir Daníel Hjaltason, Andri Valur Ívarsson og Pálmi Rafn Pálmason eitt hvor. Fyrir ÍBV skoraði Þórarinn Ingi Valdimarsson bæði mörkin.
Báðir úrslitaleikir dagsins voru bráðfjörugir og vel spilaðir af leikmönnum allra liðanna í úrslitum.
