Mótamál
Miðasala hafin á undanúrslitaleiki VISA bikars karla
Leikirnir fara fram næstkomandi sunnudag og mánudag
Í dag hófst miðasala á undanúrslitaleiki VISA bikars karla en leikirnir fara fram á sunnudaginn og mánudagskvöld. Á sunnudaginn kl. 16:00 leika Fylkir og Fjölnir og á mánudagskvöldið kl. 20:00 eigast við Breiðablik og KR.
Miðasala á leikina hófst í dag en miðasalan fer sem fyrr fram í gegnum miðasölukerfi hjá midi.is. Knattspyrnuáhugamenn eru hvattir til þess að tryggja sér miða í tíma á þessa spennandi leiki er framundan eru.
Miðaverð á leikina er 1.500 krónur fyrir fullorðna, 300 krónur fyrir 11 - 16 ára en frítt fyrir börn 10 ára og yngri.
Í hádeginu á morgun fer svo fram kynningarfundur fyrir fjölmiðla varðandi undanúrslitaleikina þar sem leikmenn og þjálfarar verða spurðir spjörunum úr.
