ÍBV komið upp - Njarðvík fallið í 2. deild
Stjarnan og Selfoss berjast um sæti í Landsbankadeildinni að ári
Heil umferð fór fram í 1. deild karla í gærkvöldi og var um 21. og næstsíðustu umferðina að ræða. ÍBV tryggðu sér sæti í Landsbankadeild karla að ári en það varð einnig ljóst að það verða Njarðvíkingar er fylgja KS/Leiftur niður i 2. deild.
Það ræðst hinsvegar ekki fyrr en í síðustu umferðinni, sem leikin verður laugardaginn 20. september, hvort það verði Stjarnan eða Selfoss sem fylgja Eyjamönnum upp. Stjarnan stendur betur að vígi og getur tryggt sér sætið með sigri á grönnum sínum í Haukum en leikið verður á Ásvöllum í Hafnarfirði. Selfyssingar taka á móti deildarmeisturunum í ÍBV. Ef Stjarnan tapar gegn Haukum eða gerir jafntefli, munu Selfyssingar tryggja sér sæti í Landsbankadeildinni að ári með sigri á ÍBV.
Allir leikir síðustu umferðarinnar fara fram næstkomandi laugardag og hefjast leikirnir kl. 14:00.
