Háttvísidagar FIFA 2008
"Heimurinn sameinast í háttvísi"
Dagana 20. til 28. september eru Háttvísidagar FIFA (FIFA Fair Play Days) haldnir hátíðlegir í 12. sinn á knattspyrnuleikjum víðs vegar um heiminn.
Þessir dagar voru valdir með tilliti til þess að 21. september síðastliðinn var alþjóðlegur friðardagur Sameinuðu þjóðanna (United Nations International Day of Peace), en á þeim degi, sem haldinn er árlega, hvetja Sameinuðu þjóðirnar til vopnahlés um allan heim.
KSÍ hefur ákveðið að velja laugardaginn 27. september sem háttvísidag FIFA á Íslandi, en þann dag fer fram lokaumferðin í Landsbankadeild karla.
Háttvísi er nokkuð sem aldrei má gleymast í knattspyrnu, því háttvísi er veigamikill þáttur í því að gera knattspyrnuna að vinsælustu íþróttagrein í heimi.
Á háttvísidögum minna leikmenn, þjálfarar, dómarar og knattspyrnuáhugafólk um allan heim á að besta leiðin til að leika knattspyrnu er að leika af háttvísi.
Háttvísi er það sem gerir knattspyrnuna þess virði að leika hana.
Hjálpumst því öll að við að gera háttvísidag FIFA eftirminnilegan!
