Mótamál
Kristinn dæmir Meistaradeildarleik í Úkraínu
Fyrsti leikur sem íslenskur dómari dæmir í Meistaradeild UEFA
Kristinn Jakobsson, milliríkjadómari, mun dæma leik Shakhtar Donetsk frá Úkraínu og Basel frá Sviss í Meistaradeild UEFA. Leikið verður í Úkraínu og fer leikurinn fram miðvikudaginn 26. nóvember. Kristni til aðstoðar verða þeir Sigurður Óli Þorleifsson og Ólafur Ingvar Guðfinnsson og fjórði dómari verður Magnús Þórisson.
Þetta er í fyrsta skiptið sem íslenskur dómari dæmir leik í Meistaradeild Evrópu og er þetta gríðarlega mikil viðurkenning á störfum Kristins og íslenskra dómara.
Lið Shakhtar og Basel leika í C riðli og er leikurinn í 5. umferð keppninnar. Þessi leikur getur haft úrslitaáhrif hvort liðið kemst áfram í UEFA bikarinn en Barcelona og Sporting Lissabon standa best að vígi að komast áfram upp úr riðlinum í Meistaradeildinni.
