Noregur á toppnum í háttvísimati UEFA
Ísland í 12. sæti af 53 Evrópuþjóðum
Það eru Norðmenn er tróna á toppi háttvísismats Evrópu en allir landsleikir og Evrópuleikir aðildarþjóða UEFA eru hafðir til hliðsjónar á þessum lista. Ísland er í 12. sæti af Evrópuþjóðunum 53. en þrjár efstu þjóðirnar fá úthlutað aukasæti í Evrópudeild UEFA.
Taldir eru til leikir á tímabilinu 1. maí 2008 til 30. apríl 2009 og er Ísland í 12. sæti með með einkunnina 8,013. Norðmenn eru efstir með 8,325, næstir koma Danir og Skotar eru í þriðja sæti. Ýmsir þættir eru metnir í þessari einkunnagjöf og eru það eftirlitsmenn UEFA á hverjum leik er meta m.a. jákvæðan leik, virðing fyrir mótherjum, virðing fyrir dómurum, framkomu áhorfenda og framkomu forráðamanna liðanna.
Í ár er sú breyting að þrjár efstu þjóðirnar hljóta sæti beint í Evrópudeildinni en áður var það efsta þjóðin er hlaut aukasæti en dregið var svo á milli þeirra þjóða er voru með einkunnina yfir 8,0.
