Valsstúlkur beint í 32 liða úrslit
Leikið heima og heiman frá og með 32 liða úrslitum
Íslandsmeistarar Vals munu fara beint í 32 liða úrslit Meistaradeildar Evrópu kvenna og sleppa því við að leika í undanriðlum eins og Íslandsmeistararnir hafa gert síðustu ár. Er þetta komið vegna góðs árangurs íslenskra félagsliða undanfarin ár.
Keppnin mun framvegis bera nafn Meistaradeildar Evrópu (UEFA Women´s Champions League). Fyrirkomulaginu hefur einnig verið breytt, á eftir riðlakeppni hefst 32 liða úrslit og verður þá leikið eftir útsláttarfyrirkomulagi, heima og heiman. Helst það fyrirkomulag út keppnina þangað til að úrslitaleiknum en þá verður aðeins einn leikur. Mun úrslitaleikur keppninar fara fram í sömu borg og úrslitaleikur Meistaradeildar karla. Úrslitaleikurinn verður því í Madrid 2010 og í London 2011.
Á sunnudaginn fara fram seinni leikir undanúrslita í Evrópukeppni kvenna. Duisburg frá Þýskalandi tekur þá á móti Lyon frá Frakklandi. Fyrri leiknum í Frakklandi lyktaði með jafntefli, 1-1. Þá tekur sænska liðið Umeå á móti Zvezda-2005 frá Rússlandi en Rússarnir höfðu betur í fyrri leiknum, 2-0.
Þá má geta þess að á dögunum lauk ótrúlegri sigurgöngu Arsenal í efstu deild kvenna í Englandi. Liðið hafði ekki tapað í 108 leikjum þegar liðið tók á móti Everton. Stelpurnar hennar Mo Marley gerðu sér lítið fyrir og lögðu Arsenal með þremur mörkum gegn engu. Var þetta fyrsta tap Arsenal á heimavelli síðan 7. nóvember 2002.
