Þátttökutilkynning í Deildarbikarkeppni KSÍ 2010
Þátttökutilkynningar þurfa að berast í síðasta lagi 24. nóvember
Sendar hafa verið út til aðildarfélaga KSÍ, þátttökutilkynningar í Deildarbikarkeppni KSÍ fyrir árið 2010. Félög skulu tilkynna þátttöku á þar til gerðu eyðublaði í síðasta lagi þriðjudaginn 24. nóvember.
Eftirfarandi atriði er gott að hafa í huga:
Kostnaður
Ekki verða innheimt þátttökugjöld í Deildarbikarkeppni KSÍ 2010.
Fjöldi liða
Öll félög sem sendu meistaraflokk til keppni á Íslandsmótinu 2009 og hyggja á keppni á Íslandsmótinu 2010 hafa heimild til að senda lið til keppni.
Keppnisfyrirkomulag
Verið er að skoða tillögur sem borist hafa um breytt fyrirkomulag í A-deild karla. Ákvörðun um slíkt verður tekin á næstu dögum. Að öðru leiti er gert ráð fyrir að keppt verði með sama fyrirkomulagi og í mótinu 2009.
Rétt er að vekja athygli á því að keppni í A-deild karla hefst um 20. febrúar en keppni í öðrum deildum í byrjun mars.
Leikstaðir
Leikir í deildarbikarnum fara að mestu fram í knattspyrnuhúsunum á Akranesi, Akureyri, Fjarðabyggð, Kópavogi, Reykjanesbæ og í Reykjavík. Einnig verður leikið á öðrum völlum eftir þörfum. Reynt verður að hafa keppni í B- og C-deild svæðaskipta.
Utanferðir félaga og aðrir viðburðir
Mikilvægt er að tilkynna mótanefnd um þá daga sem félagið getur ekki leikið vegna æfingaferða eða annarra viðburða. Tekið verður fullt tillit til utanferða félaga við niðurröðun mótsins ef upplýsingar berast í tæka tíð.
