Eiður Smári og Þóra knattspyrnufólk ársins 2009
Veitt eru verðlaun fyrir þrjú efstu sætin hjá körlum og konum
Leikmannaval KSÍ hefur valið Eið Smára Guðjohnsen og Þóru B. Helgadóttur knattspyrnufólk ársins 2009. Þetta er í sjötta skiptið sem að knattspyrnufólk ársins er sérstaklega útnefnt af KSÍ. Það eru fjölmargir aðilar, m.a. fyrrverandi landsliðsmenn, þjálfarar og forystumenn í knattspyrnuhreyfingunni, er velja knattspyrnufólk ársins. Veitt eru verðlaun fyrir þrjú efstu sætin hjá körlum og konum.
Þau sem lentu í þremur efstu sætunum í Leikmannavali KSÍ 2009 hjá körlum og konum eru eftirfarandi:
Knattspyrnumaður ársins 2009 – Eiður Smári Guðjohnsen
Eiður Smári Guðjohnsen lék með Barcelona á síðasta tímabili en þetta stórkostlega knattspyrnulið vann alla stóru titlana á keppnistímabilinu. Hann varð fyrsti Íslendingurinn til þess að vinna Meistaradeild Evrópu en einnig vann Barcelona Ofurbikar Evrópu (UEFA Super Cup), spænsku deildina og spænska bikarinn. Eiður lék 33 leiki með Barcelona í öllum keppnum á tímabilinu og skoraði í þeim 4 mörk. Eiður samdi svo við franska félagið Monaco til tveggja ára nú í sumar. Eiður er markahæsti leikmaður karlalandsliðs Íslands frá upphafi og hefur skorað 24 mörk í 61 landsleik og bætir við metið með hverju landsliðsmarki. Eiður lék 6 landsleiki á árinu og skoraði í þeim tvö mörk.
Knattspyrnukona ársins 2009 – Þóra B. Helgadóttir
Þóra B. Helgadóttir samdi við norska liðið Kolbotn á árinu og sló þar í gegn. Hún var lykilmaður liðsins sem hafnaði í þriðja sæti norsku deildarinnar og var svo kjörin besti leikmaður deildarinnar en það eru leikmennirnir sjálfir sem standa að kjörinu. Seint á árinu samdi hún svo við sænska liðið Malmö til þriggja ára. Þóra var einnig í stóru hlutverki hjá kvennalandsliðinu á árinu og lék 8 landsleiki, þar af tvo í úrslitakeppni EM í Finnlandi. Hún hefur leikið alls 68 landsleiki og er fjórða leikjahæsta landsliðskona Íslands.
2. sæti karla – Kristján Örn Sigurðsson
Kristján Örn Sigurðsson var sem fyrr lykilleikmaður í norska liðinu Brann sem hafnaði í 5. sæti deildarinnar en þetta er fimmta tímabilið sem Kristján leikur með Brann og er hann álitinn einn sterkasti varnarmaðurinn í norsku deildinni. Kristján er einnig lykilmaður í varnarleik íslenska landsliðsins en hann lék níu landsleiki á árinu og skoraði í þeim 2 mörk og tvöfaldaði þar með fjölda landsliðsmarka sinna.
2. sæti kvenna – Katrín Jónsdóttir
Katrín Jónsdóttir var fyrirliði Vals sem varð Íslandsmeistari fjórða árið í röð og hampaði einnig VISA-bikarnum. Hún lék alla leiki Vals í Pepsi-deildinni og skoraði í þeim 8 mörk. Hún var einnig fyrirliði landsliðsins og lék alla 14 landsleiki Íslands á árinu í hjarta varnarinnar en skoraði engu að síður 3 mörk í þessum leikjum. Hún hefur leikið langflesta landsleiki kvenna og eru þeir orðnir 92 talsins og landsliðsmörkin eru orðin 15 alls en Katrín lék sinn fyrsta A landsleik árið 1994.
3. sæti karla – Aron Einar Gunnarsson
Aron Einar Gunnarsson hefur stimplað sig inn sem einn af lykilmönnum Coventry í ensku Championship deildinni og hefur vakið eftirtekt stærri félaga þar í landi. Þessi tvítugi leikmaður lék sinn fyrsta A landsleik á síðasta ári og gegnir æ stærra hlutverki með landsliðinu. Hann lék 7 landsleiki á árinu og eru þeir orðnir 16 talsins. Hann lék einnig einn landsleik með U21 liðinu og skoraði þar eitt mark í stórum útisigri á Norður Írum.
3. sæti kvenna – Hólmfríður Magnúsdóttir
Hólmfríður Magnúsdóttir lék með Kristianstad í Svíþjóð og lék stórt hlutverk með liðinu sem var lengst af í fallbaráttu og skoraði 5 mörk í 21 leik í deildinni en hefur nú samið við Philadelphia í bandarísku atvinnudeildinni. Hólmfríður lék alla 14 landsleiki kvennalandsliðs Íslands á árinu og skoraði í þeim sex mörk. Hún skoraði eina mark Íslands í úrslitakeppninni í Finnlandi gegn Frökkum. Hún lék sinn fimmtugasta landsleik á árinu og hefur skorað í þeim 15 mörk.
Knattspyrnusamband Íslands óskar ofantöldum leikmönnum til hamingju með frábæran árangur á árinu.
