Fjármagn frá UEFA til íslenskra félagsliða 2009
Heildarframlag UEFA og KSÍ til aðildarfélaga á árinu 2009 er um 213 milljónir króna
Líkt og áður rann hluti af þeim tekjum sem UEFA hefur af Meistaradeildinni (UEFA Champions League) til félaga í aðildarlöndum sambandsins. Greiðslur UEFA fara annars vegar til þeirra félaga er taka þátt í Meistaradeild UEFA og Evrópudeild UEFA (UEFA Europa League) og hins vegar til barna- og unglingastarfs aðildarfélaga í þeim deildum sem hafa innleitt leyfiskerfi og hafa samþykkta uppeldisáætlun.
Íslensk félagslið nutu góðs af þessu og fengu alls rúmar 180 milljónir í sinn hlut frá UEFA auk þess sem KSÍ lagði til um 33 milljónir króna til barna– og unglingastarfs aðildarfélaga eins og fram hefur komið.
Þau félög sem tóku þátt í UEFA keppnum 2009 fengu í sinn hlut samtals um 143 milljónir króna, FH um 60 milljónir fyrir þátttöku í forkeppni Meistaradeildar UEFA (UEFA Champions League), og Íslandsmeistaratitilinn 2008, Fram og KR um 33 milljónir hvort félag fyrir þátttöku í forkeppni Evrópudeildarinnar (UEFA Europa League), og Keflavík um 16 milljónir fyrir þátttöku í forkeppni sömu keppni. Framlög til félaganna hækkuðu því umtalsvert frá síðasta ári en kostnaður þeirra vegna þátttöku í UEFA keppnum hækkaði jafnframt verulega.
Heildarframlag UEFA og KSÍ til aðildarfélaga á árinu 2009 er því um 213 milljónir króna en árið 2008 var þessi upphæð um 166 milljónir króna.
