Fjör og frábær tilþrif í Futsal
Undanúrslit karla og kvenna fara fram í Laugardalshöllinni á morgun, laugardag
Í kvöld hófst úrslitakeppni meistaraflokka í Íslandsmótinu í innanhúsknattspyrnu og var leikið í fjórðungsúrslitum karla. Það voru hörkuleikir og skemmtileg tilþrif sem boðið var upp á kvöld. Leikið var í Laugardalshöllinni og Álftanesi en undanúrslit karla og kvenna fara fram í morgun, laugardaginn, 9. janúar.
Í Laugardalshöllinni áttust fyrst við Keflavík og Hvöt. Þetta reyndist vera hörkuleikur þó svo að ekki hafi margt bent til þess í hálfleik en þá höfuð Keflvíkingar forystu, 4 - 0. Hvatarmenn, sem höfðu Íslandsmeistaratitil að verja, komu ákveðnir til leiks í seinni hálfleik og söxuðu jafnt og þétt á forskot Keflvíkinga. Þegar tvær mínútur voru eftir af leiknum var staðan 5 - 4 Keflvíkingum í vil og þeir tryggðu sér sigurinn endanlega með tveimur mörkum í lokin og tryggðu sér þar með sæti í undanúrslitum. Þar mæta þeir Víkingi frá Ólafsvík en þeir mættu Hattarmönnum á Álftanesi í dag og höfuð sigur, 10 - 3 eftir að staðan í leikhléi hafði verið 4 - 1.
Seinni leikur kvöldsins í Laugardalshöllinni var á milli Leiknis Fáskrúðsfjarðar og Víðis. Víðismenn höfðu undirtökin í byrjun en austanmenn voru ekki langt undan. Þegar um 5 mínútur lifðu eftir af fyrri hálfleik var staðan 3 -5 fyrir Víðismenn en þeir bættu við tveimur mörkum til viðbótar og leiddu í leikhléi, 3 - 7. Garðbúar skelltu svo í lás í seinni hálfleik og bættu við átta mörkum og tryggðu sér sæti í undanúrslitum með úrslitunum 3 - 15.
Seinni leikurinn á Álftanesi var viðureign ÍBV og Fjölnis og var þar um hörkuviðureign að ræða. Jafnræði var með liðunum allan leikinn en Fjölnismenn leiddu í leikhléi, 1 – 2. Sama baráttan var í seinni hálfleik og þótti leikurinn gríðarlega skemmtilegur á að horfa. Eyjamenn jöfnuðu 2 - 2 og jafnt var einnig 3 - 3. Fjölnismenn skoruðu fjórða markið og leikurinn var í járnum allt þar til undir blálokin þegar piltarnir úr Grafarvoginum skoruðu fimmta markið er 17 sekúndur lifðu eftir af leiknum og leikur við Víking Ólafsvík framundan.
Fyrsti leikur morgundagsins verður leikur Víkings Ólafsvíkur og Keflavíkur í karlaflokki og hefst hann kl. 10:00 í Laugardalshöllinni en undanúrslitaleikir karla og kvenna, sem og úrslitaleikir, fara fram þar. Því næst mætast Tindastóll og Þróttur í undanúrslitum hjá konunum og hefst sá leikur kl. 11:30. Karlarnir eru næstir því kl. 13:00 eigast við og Víðir og síðasti leikur morgundagsins er svo leikur ÍBV og ÍR í kvennaflokki sem hefst kl. 14:30.
Sigurvegarar morgundagsins leika svo til úrslita á sunnudaginn og hefst úrslitaleikurinn í kvennaflokki kl. 11:15 og í karlaflokki verður leikið til úrslita kl. 13:00.
