Suðurnesjaslagur í úrslitum Futsal karla
ÍBV og Þróttur R. leika til úrslita hjá konunum
Í dag var leikið til undanúrslita í Íslandsmótinu i innanhússknattspyrnu hjá körlum og konum og var Laugardalshöll vettvangurinn. Það er ljóst að á morgun mætast í úrslitum í kvennaflokki, ÍBV og Þróttur Reykjavík en hjá körlunum er boðið upp á Suðurnesjaslag því þar mætast Keflavík og Víðir.
Það voru Keflvíkingar og Víkingur Ólafsvík sem að hófu leik í morgun og voru Ólsarar sterkari aðilinn framan af í leiknum, leiddu m.a. um tíma í fyrri hálfleik 3 - 1. Keflvíkingar minnkuðu muninn fyrir leikhlé og staðan því 3 - 2 fyrir Víkinga. Seinni hálfleikur var hinsvegar eign Keflvíkinga sem að skoruðu fjögur mörk í hálfleiknum án svars frá Víkingum. Lokatölur, 3 - 6 og sæti fyrir Keflvíkinga í úrslitum. Þar mæta þeir grönnum sínum Víði Garði. Víðismenn tóku á móti Fjölni í hörkuleik. Markalaust var í leikhléi þar sem sterkar varnir voru í aðalhlutverki. Lengi framan af seinni hálfleiknum var í allt í járnum en þegar um 6 mínútur voru eftir af leiknum komust Víðismenn yfir og bættu svo við öðru marki um mínútu síðar. Þar við sat og Víðismenn fögnuðu sigri.
Hjá konunum mættust Tindastóll og Þróttur í fyrri undanúrslitaleiknum. Sauðkrækingar byrjuðu betur og komust snemma í tveggja marka forystu en þá rönkuðu Þróttarstúlkur við sér og bættu við fjórum mörkum fyrir leikhlé og leiddu 2 -4 þegar liðin gengu til búningsherbergja. Þróttarar höfðu svo undirtökin lengst af í seinni hálfleik og þegar um mínúta var eftir af leiknum höfðu þær yfir, 4 - 7. Þá tók við alveg ótrúlegur kafli hjá stúlkunum úr Skagafirði því þessi tæpa mínúta dugði þeim til þess að skora þrjú mörk og knýja fram framlengingu. Magnaður leikkafli og sýnir að hlutirnir eru fljótir að gerast í Futsal. Þróttarar náðu hinsvegar undirtökunum aftur í framlengingunni og tryggðu sér að lokum sigur, 7 - 10.
Það verður ÍBV sem verður andstæðingur Þróttar í úrslitaleiknum en ÍBV lagði ÍR að velli í síðasta leik dagsins, 5 - 3. Vestmannaeyingar höfðu undirtökin í leiknum en ÍR stúlkur voru aldrei langt undan og var leikurinn allan tímann spennandi. ÍBV leiddi í leikhléi, 3 - 2 og tryggði sér að lokum sæti í úrslitaleiknum, 5 - 3.
Úrslitaleikirnir fara fram á morgun, sunnudaginn 10. janúar, í Laugardalshöllinni. Kl. 11:15 mætast ÍBV og Þróttur í kvennaflokki og strax á eftir, eða kl. 13:00 leika Keflavík og Víðir í úrslitum hjá körlum. Áhorfendur eru hvattir til þess að kíkja í Laugardalshöllina og sjá spennandi viðureignir þar sem fyrstu titlunum á árinu verður hampað.
