Fyrstu Íslandsmeistarar á nýju ári - ÍBV og Keflavík
Íslandsmótinu í innanhússknattspyrnu lauk í dag
Í dag voru krýndir fyrstu Íslandsmeistararnir á nýju knattspyrnuári en þá lauk keppni meistaraflokka í Íslandsmótinu í innanhússknattspyrnu. Það voru Vestmannaeyingar sem fögnuðu sigri í kvennaflokki en Keflvíkingar hömpuðu titlinum í karlaflokki.
ÍBV mætti Þrótti Reykjavík í úrslitum í kvennaflokki og það voru fljóðin frá Reykjavík sem byrjuðu leikinn af krafti og sóttu mikið í byrjun. Tvisvar hafnaði knötturinn í tréverkinu á Eyjastúlkum en þær stóðu af sér þennan stórsjó og sigldu hægt og sígandi inn í leikinn. Seiglan bar árangur því þær höfðu tveggja marka forskot þegar að fyrri hálfleikur var hálfnaður og eftir það voru undirtökin þeirra. Þriðja markið leit dagsins ljós fljótlega upp úr miðjum fyrri hálfleik og þriggja marka forysta ÍBV var of mikil fyrir Þróttarstúlkur að þessu sinni. Þær gáfust þó aldrei upp og var leikurinn ákaflega vel leikinn af hálfu beggja liða. Lokatölur leiksins urðu 5 - 1 og kom það í hlut Eyjastúlkna að lyfta Íslandsmeistaratitlinum.
Það var boðið upp á sannkallaðan Suðurnesjaslag í karlaflokki en þar mættust Keflavík og Víðir. Leikurinn var gríðarlega jafn og spennandi allan leikinn og leit sigurmarkið dagsins ljós þegar um 50 sekúndur lifðu leiks. Víðismenn, sem voru að leika þriðja úrslitaleikinn á þremur árum í Futsal, komust yfir á 9. mínútu en Keflvíkingar jöfnuðu metin aðeins örfáum sekúndum síðar. Aftur komust Garðbúar yfir en tveimur mínútum síðar jöfnuðu Keflvíkingar metin og komust yfir einni mínútu fyrir leikhlé og leiddu í leikhléi, 3 - 2. Þeir skoruðu svo fyrsta mark seinni hálfleiks eftir fjögurra mínútna leik og staðan hélst óbreytt þangað til að átta mínútur voru eftir af leiknum að Víðismenn minnkuðu muninn. Hlutirnir gerðust svo hratt í kjölfarið, Keflvíkingar náðu aftur tveggja marka forystu þegar sex mínútur lifðu leiks og virtust ætla að landa sigrinum. Víðismenn gáfust ekki upp og rúmri einni mínútu fyrir leikslok voru þeir búnir að jafna metin. Þessi rúma mínúta dugði hinsvegar Keflvíkingum því 50 sekúndum fyrir leikslok skoruðu þeir sigurmarkið við mikinn fögnuð og titillinn þeirra.
