Íslandsmótum yngri flokka innanhúss lokið
Úrslitakeppnir í 3. - 5. flokks karla og kvenna fóru fram um helgina
Um helgina fóru fram úrslitakeppnir í 3. - 5. flokki karla og kvenna í Íslandsmótinu innanhúss og sáust mörg glæsileg tilþrif en keppni í 2. flokki var þegar lokið. Breiðablik vann þrjá Íslandsmeistaratitla á þessari innanhússvertíð.
Eins og áður er leikið eftir innanhúsreglum FIFA í innanhússknattspyrnu, Futsal, en sú íþrótt verður sífellt vinsælli á heimsvísu. Þar hefur boltinn sjálfur mikið að segja að hann er þeim eiginleikum gæddur að skoppa mun minna heldur en venjulegur bolti. Þýðir það að þátttakendur hafa mun betri stjórn á boltanum og sjást því mörg skemmtileg tilþrif á vellinum, ekki síst í yngstu flokkunum.
Íslandsmeistarar innanhúss 2010:
2. flokkur kvenna: Þróttur Reykjavík
2. flokkur karla: Breiðablik
3. flokkur kvenna: Valur
3. flokkur karla: Fylkir
4. flokkur kvenna: Víkingur R.
4. flokkur karla: Breiðablik
5. flokkur kvenna: Breiðablik
5. flokkur karla: Valur
Keppni meistaraflokka lauk fyrstu vikuna í janúar eins og áður hefur komið fram. Í kvennaflokki sigraði ÍBV en hjá körlunum voru það Keflvíkingar sem tryggðu sér Íslandsmeistaratitilinn og um leið þátttökurétt í Evrópkeppni félagsliða(Futsal Cup).
