Lengjubikarinn - Keppni í A deild karla hefst um helgina
Níu leikir fara fram um helgina
Á laugardaginn hefst keppni í A deild í Lengjubikar karla og eru þá fjórir leikir á dagskrá. Á sunnudeginum fara svo fram fimm leikir. Allir leikir helgarinnar fara fram í Egilshöllinni að undanskildum leik Fjarðabyggðar og Þórs sem fer fram í Fjarðabyggðarhöllinni.
Ábendingar til félaga
Félög í Lengjubikarnum eru beðin að hafa eftirfarandi atriði í huga:
Framkvæmd leikja 2010
Leikskýrsla
Félög skulu fylla út leikskýrslu eins og í öðrum mótum á vegum KSÍ. Meðferð þeirra skal vera með hefðbundnum hætti og fylgja skal ýtrustu kröfum um útfyllingu. Leikskýrslueyðublöð liggja frammi í dómaraherbergi á leikstað.
Keppnisknettir
Félag sem skráð er á undan (heimalið) ber ábyrgð á að keppnisknettir séu til staðar.
Boltakrakkar
Félag sem skráð er á undan (heimalið) skal gera sitt ýtrasta til að boltakrakkar séu til taks
Upphitun
Til að leikir geti farið fram á tilsettum tíma þurfa félögin í mörgum tilfellum að hita upp utan leikvallar. Þá skal þess gætt að ekki sé verið að trufla þá leiki sem eru í gangi. Mikilvægt er að þjálfarar og leikmenn geri sér grein fyrir þessu.
Búningar og fjöldi leikmanna
Upplýsingar um liti búninga er að finna á vef KSÍ. Ef búningar liða eru of líkir, skal félagið sem fyrr er talið (heimalið) halda sínum aðalbúningi. Leikmönnum er heimilt að leika í síðbuxum innan undir stuttbuxum. Búningar skulu vera númeraðir frá 1 – 30.
Heimilt er að skrá 18 leikmenn á leikskýrslu í hverjum leik, 11 sem hefja leikinn og 7 varamenn. Heimilt er að skipta öllum varamönnum inn á í hverjum leik með þeirri takmörkun að aðeins er heimilt að gera að hámarki 4 skiptingar í síðari hálfleik (og/eða framlengingu þegar við á).
Hlutgengi leikmanna
Hlutgengir til þátttöku eru leikmenn sem eru félagar í því félagi, sem þeir keppa með, og uppfylla ákvæði reglugerða KSÍ um félagaskipti leikmanna.
Athugið sérstaklega eftirfarandi:
Félag, sem notar leikmann sem ekki hefur keppnisleyfi með því eða notar leikmann, þjálfara eða forystumann í leikbanni, telst hafa tapað leiknum með markatölunni 0-3 nema tap hafi verið stærra, þá skal sú markatala ráða. Staðfesti skrifstofa KSÍ að þátttakandi hafi verið óhlutgengur í leik skal mótanefnd þegar í stað skrá úrslit leiksins skv. ofangreindu og tilkynna það viðkomandi félögum. Heimilt er að kæra slíka skráningu til aga- og úrskurðarnefndar KSÍ og skal kærufrestur telja frá þeim degi sem tilkynningin er gefin út. Viðkomandi félög verða sektuð samkvæmt reglugerð KSÍ um knattspyrnumót.
Frestun leiks
Þegar taka þarf ákvörðun um frestun leiks, skal hafa samráð við starfsmenn mótanefndar.
Mótavakt er í síma 510 2925.
Úrslit á vef KSÍ og tölvuskráning leikskýrslna
Gerð er krafa um að það félag sem fyrr er talið (heimalið) skrái úrslit leiks í gagnagrunn KSÍ strax og leik lýkur (hægt að senda úrslit með SMS-skeyti). Heimalið skal einnig skrá upplýsingar af leikskýrslu innan tveggja klst. frá því að leik lýkur. Æskilegt er að áætlaður áhorfendafjöldi sé skráður.
